Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.
Lofpsalm 107:1, 8.
Geloofsbelydenis
Wet
Psalm 130:1 (tweede beryming)
Gebed.
Psalm 119:49.
Skriflesing: 1 Johannes 1.
Teks: 1 Johannes 1: 8
As ons beweer dat ons nie sonde het nie, bedrieg ons onsself en is die waarheid nie in ons nie.
In die eerste paar verse van die brief word die inhoud baie duidelik en in perspektief gestel: Dit gaan daaroor dat Jesus Christus met alles wat Hy met sy menslike liggaam gedoen het, aan ons die ewige lewe gee, as ons in Hom glo.
Kom ons gee aandag aan die volgende sake wat uit hierdie Skrifgedeelte vorentoe kom:
1. Jesus is die Ewige en Lewende.
2. Ons ewige lewe is onlosmaakbaar vas aan Jesus Christus.
3. Waarheen nou?
1. Jesus is die ewige en Lewende.
Jesus self word die Lewe genoem, en vers 2 kondig baie duidelik aan dat dit vir ons gaan oor die ewige lewe.
Die Heilige Gees onderstreep sekere geloofswaarhede vir ons deur dit oor en oor vir ons te sê.
- So toon die hele 1 Johannesbrief by herhaling aan dat Jesus liggaamlik op die aarde gelewe het.
- Waarom? Die Bybel toon aan dat dit belangik is dat ons dit moet weet en glo, omdat dit die manier is waarop Jesus Christus die ewige lewe gee aan ons wat in Hom glo.
- Daarom toon Johannes aan dat dit wat hulle liggaamlik van Jesus gesien het, inderdaad Goddelik is:
- Jesus se dood en opstanding en hemelvaart is die deur na die ewige lewe toe.
- Jesus is die lewende Seun van God.
Johannes was sy hele dissipelskap en apostelskap deur baie bewus van hierdie feit, want Hy skryf dit in die evangelie ook so neer:
Die Woord het mens geword en het onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en waarheid (Johannes 1: 14).
Wat deur die Bybel onderstreep word, is dat die Here wil hê dat ons gelowiges moet waarneem dat Jesus Christus die persoonlike Lewe is.
- Hy is die Ewige.
- Deur Hom alleen het ons toegang tot die ewige lewe.
Daarom herhaal die brief verskeie dinge rondom die Persoon van Jesus, byvoorbeeld:
- dat Jesus die Christus is (1 Johannes 2: 22; 5: 1).
- dat Jesus die Seun van God is (1 Johannes 5: 5).
- dat Jesus liggaamlik op ons aarde was ( 1 Johannes 4: 2, 3, 4).
- dat Jesus God se Eniggeborene is wat tot versoening in die wêreld gestuur is. (1 Johannes 4: 9, 10, 14; 2: 2).
- dat Jesus sy bloed gegee het tot reiniging van ons sondes.(1 Johannes 1: 7; 3: 16). Sy bloed is die bloed van die Seun van God.
- dat ons Jesus se lewenswandel moet navolg (1 Johannes 2: 6).
- Jesus is die vleesgeworde Woord en die ewige Lewe. Wie met Hom gemeenskap het, deel in die ewige lewe en wie nie met Hom gemeenskap het nie, mis die ewige lewe (1 Johannes 5: 11, 12).
Let op na die rede waarom al hierdie dinge wat Jesus raak, vir ons belangrik is:
- In al hierdie dinge word die ewige lewe vir ons geopenbaar.
- Die ewige lewe is in Jesus Christus geopenbaar en ons kan net by die ewige lewe uitkom as ons hierdie dinge glo en Jesus volg in sy lewenseerlikheid en gehoorsaamheid aan die Here.
Die apostel Johannes gaan verder in sy brief en hy lei die gelowiges om hierdie dinge toe te pas op hulle (ons) eie lewens. Daarom stel hy heel eerste die vertrekpunt vanwaar mens moet begin: God is Lig. By God is nie donkerte nie (vgl. 2 Johannes 1: 4; Johannes 1: 4).
Dit laat mens onwillikeurig dink aan ander uitsprake wat die Here Jesus gemaak het, wat almal deur Johannes onthou is:
- Ek is die lig vir die wêreld. Wie My volg, sal nooit in die duisternis lewe nie, maar sal die lig hê wat lewe gee (Johannes 8: 12).
- Ek is die weg en die waarheid en die lewe. Niemand kom na die Vader toe behalwe deur My nie (Johannes 14: 6).
- Ek is die opstanding en die lewe. Wie in My glo, sal lewe, al sterwe hy ook. (Johannes 11: 25).
2. Ons ewige lewe is onlosmaakbaar vas aan Jesus Christus
Daar is dus net lig en waarheid en opstanding uit die dood waar die Here Jesus is.
- Iemand wat uitvind dat hy besig is om sonde te doen, is besig met donker werke wat nie met die Here geïdentifiseer kan word nie.
- Sonde word dikwels in die Bybel uitgebeeld met die beeld "donker/duisternis." (Johannes 3: 19; Efesiërs 5: 8; Lukas 16: 8; 1 Timoteus 5: 5).
Daarteenoor word die heerlikheid van die Here in 1 Timoteus 6: 16 met klem as lig uitgebeeld:
- Die Here woon in 'n ontoeganklike lig.
- In hierdie beeld vervloei lig en ewige lewe met mekaar.
- God is Lig en daar is nie skadukolle in sy bestaan of in sy nabyheid nie.
Let op hoe die Bybel hierdie saak op ons lewens toepas:
- As ons beweer dat ons in 'n innige verbinding (gemeenskap) met die Here lewe, moet daar geen donker kolle in ons lewens voorkom nie.
- As ons lewens dus donker plekke vertoon, is ons in stryd met die Here.
- Donker plekke is onheiligheid en verkeerdheid.
- Die bedoeling is nie dat hier verwys word na oomblikke van swakheid wanneer ons struikel nie.
- Die bedoeling is dat hier verwys word na sondes waarin ons volhard (NB v. 7).
- Op ander plekke in die Bybel kry ons redelike lang lyste van sondes wat in hierdie kategorie val: Liefdeloosheid onreinheid, bedrog, onwaarheid.
Die punt wat Johannes maak, is dat as hierdie verkeerde dinge voorkom (of die ander nie voorkom nie!) ons oneerlik is teenoor die Here. Dan lieg ons. Hierdie dinge staan teenoor die suiwer elemente van die lewe by die Here, naamlik blydskap, vrede, opregtheid en 'n eerlike lewe.
Dit gaan oor die woord "lewe" (OAV "wandel") wat in vers 6 voorkom.
- Die woord beskryf 'n bestendige (in hierdie geval: negatiewe) optrede:
- 'n beplande doen van 'n sondige daad sonder dat daar berou oor is en sonder dat daar 'n breek met die verkeerde ding kom.
Ons moet nie hierdie soort van optrede deurmekaarmaak met dit waarvan Paulus in Romeine 7: 15vv. praat nie.
- Daar sê hy dat hy nie die kwaad wil doen nie.
- Hy wil die goeie doen, maar dan oorval die kwaad hom.
- Hy sê ook dat dit nie meer hy is wat die sonde doen nie.
- Dit is die kwaad wat in hom woon.
- Hy is so in verset teen die sonde in hom dat hy uitroep dat die Here hom tog moet help (Rom. 7: 24vv.).
Johannes bedoel nie hierdie manier van sonde doen nie.
- Hy laat dit duidelik blyk dat die gelowige waarvan hy praat, (v. 7) waarlik met die Here gemeenskap het.
- Dis iemand wat besef dat hy/sy dit tog nodig het dat hy deur die bloed van die Here Jesus gereinig moet word.
- Hy is dus skuldig omdat hy wel in die sonde struikel.
In effek het iemand wat in sonde volhard, dan nie gemeenskap met die Here nie - al beweer ons dit.
- Die bewys daarvoor lê dan in ons eie lewe, omdat ons dan nie die waarheid doen nie.
- NB die waarheid van jou lewe lê nie net in dit wat jy sê nie, maar veral in wat jy doen.
- Johannes maak hier aanspraak op iets meer as opregtheid:
- Dit moet 'n opregtheid wees waaruit die gemeenskap met die Here uitskyn.
- Die Here belkemtoon in hierdie gedeelte dat 'n rein lewe met God ook 'n rein lewe met mekaar insluit.
3. Waarheen nou?
Waar wil die Here met ons heen? Wat is sy boodskap?
- Hy wil hê dat ons werklike lewensvreugde moet geniet.
- Hy wil ons lei sodat ons ons lewe voluit in die lig van die Here, m.a.w. in die openbaring van Christus en in die lig van God se Woord moet inrig.
Die Here stel dit baie treffend:
- Maar as ons in die lig wandel soos Hy (Jesus) in die lig is, het ons gemeenskap met mekaar.
- Ons sou verwag dat die Bybel sou sê dat ons dan gemeenskap met God het.
- Maar dit staan nie daar nie, omdat gemeenskap met God dadelik in jou omgang met jou naaste duidelik word.
Die bloed van Jesus Christus reinig ook menseverhoudinge, want ons almal loop deurmekaar met verkeerde dinge waarvan ons gereinig moet word.
- Die bloed van Jesus Christus wys ons juis op die sonde van die mense wat tot sy teregstelling gelei het, en dat die Here dan deur sy bloed die toestand omkeer, naamlik:
- om ons deur daardie bloed ons sondes te vergewe
- en om ons deur daardie bloed op die pad van heiligwording te plaas.
Die mens se verwaandheid of meerderwaardige denke van homself word verskerp:
- As daar iemand is wat wil beweer dat hy nie sonde doen nie, mis hy die waarheid.
- Die waarheid is by God alleen. Dus: hy mis die Here ook.
- Daar is dan geen omgangsverhouding tussen hom en die Here nie, want hy mislei homself.
Daar is altyd mense wat glo dat hulle bitter min sonde doen, of dat hulle lewe feitlik sondeloos is. Hierdie sin is 'n terugspeling op vers 6. So 'n mens mis gemeenskap met Jesus Christus dan ook heeltemal. Hy leef heeltemal uit die lig van God se genade uit.
- Iemand wat in sy verwaandheid beweer dat hy nie in sy verlede sonde gedoen het nie, maak Jesus Christus tot leuenaar.
- Die uitspraak van die Bybel is baie duidelik dat daar geen enkele mens is wat nie skuldig staan voor die Here nie (Psalm 14: 3: Romeine 3: 19).
- Dit is juis hierdie sondes wat veroorsaak het dat God se Seun die verskriklike kuisiging en alles wat daarmee saam gebeur het, moes deurgaan.
- Ons moet nie die lyding van Jesus Christus verag deur onsself onskuldig te hou as dit by sondes kom nie.
Hoe moet iemand wat sonde gedoen het die pad vorentoe loop?
- Hy moet die teenoorgestelde doen as om sy sondes te ontken.
- Hy moet sy sondes opreg en eerlik voor die Here bely.
- God is getrou aan sy belofte in Christus waarmee Hy aan die wat in Jesus Christus glo, vryskelding van sondes gee (Johannes 3: 14, 15).
Die rede is voor die hand liggend: Die bloed van Jesus het hulle sondes betaal en hulle oortredinge met God versoen. Daar gebeur twee dinge gelyk:
- Die een is dat die Here ons ons sondes vergewe,
- maar die ander een is dat ons uit ons sondeverdorwenheid uitgesuiwer word.
Anders gestel:
- Die Heilige Gees lei ons om van die betrokke sonde waaroor dit gaan afstand te doen.
- Ons doen dit dan net nie meer nie.
- Daarin kom die vergifnis van die Here dan ook prakties na vore.
Ons moet die eerlike pad loop van sondebelydenis voor die Here.
- 'n Pad van bid en bekeer.
- 'n Pad waarop ons seker kan wees van die skuldvergifnis van die Here oor ons sondes.
Al die dinge staan eintlik bekend onder een naam, naamlik heiligwording.
- Die Here maak ons heilig, maar ons antwoord daarop deur self ook teen die sonde te veg.
- Dit is 'n lang en swaar proses, maar die einde daarvan is baie heerlik en wonderlik.
- Die Bybel leer in hoofstuk 3: 9 dat iemand wat 'n kind van God is en op hierdie pad beweeg, nie meer sonde doen nie.
Natuurlik lyk dit asof dit in konflik met ons teksvers is, want daar staan presies die teenoorgestelde, naamlik dat iemand wat beweer dat hy nie sonde doen nie, lieg.
- Die feit is dat altwee die tekste reg en waar is.
- Die eerste vers kyk terug in ons verlede en hy sien al die sondes wat ons gedoen het.
- Die tweede teks sien vorentoe en sien ons by die eindbestemming.
- Finaal en beslis kom die aankondiging: 'n kind van God doen by sy eindbestemming nie meer sondes nie.
Broeders en susters, kom ons maak 'n saak daarvan om die Here reg te ken en reg te aanbid. Ons veg met al ons krag teen enige vorm van verwaandheid in ons en bely ons sondes en leef daarvan af weg.
Amen.
Slotgebed.
Slotpsalm 146:1, 8.
Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.
Dr. M.J. du Plessis
Gereformeerde Kerk Bellville
Datum: 25 Augustus 2002.