Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van
God ons Vader en die Here Jesus Christus deur die kragtige werking van
God die Heilige Gees.
Amen.
Lofpsalm 145:1, 12
Geloofsbelydenis
Wet
Psalm 143:8
Gebed.
Psalm 138:1
Skriflesing: 1 Tessalonissense 4.
Teks: Kategismus Sondag 41. 1 Tessalonisense 4:7
Want God het ons nie tot onreinheid geroep nie, maar tot heiligmaking.
Tydens die afgelope Sinode het die deputaat van die Gereformeerde Kerke
in Nieu Zealand gerapproteer dat daar deesdae baie min jongemse is wat
nog trou. Hulle woon net saam. Om hulleself te beveilig
gaan stel hulle by ‘n prokureur ‘n saambly ooreenkoms op.
Dieselfde neiging begin in ons land posvat en daarom moet ons van tyd
tot tyd in die prediking gaan kyk na onsedelikheid en die gevolge
daarvan by die Here.
In die gedeelte wat ons saam gelees het, is dit duidelik dat God alle onkuisheid vervloek.
- Dit is die terrein waarop daar die meeste sonde gedoen is oor al die eeue van die skepping af.
- Die sewende gebod is een van die gebooie waarmee ons die meeste
in ons gedagtes rondspeel - terwyl ons koppig bly beweer
dat daar geen sondes gepleeg word ten opsigte van ons heiligheid en die
heiligheid van ons naaste nie.
Die sewende gebod leer ons dat die Here ontsteld is oor enige vorm van onkuisheid.
- Maar hierdie gebod leer ons ook wat ons roeping binne en buite die huwelik is ten opsigte van kuisheid.
- Dit leer ons dat as ons hierdie gebod hou, die Here ons liggaam en siel - en die gemeente s’n bewaar!
Hierdie saak van kuisheid weeg geweldig swaar by die Here. In
Levitikus 18 en 20 is daar ‘n lang lys van oortredinge op die gebied
van onkuisheid. En by almal gebied die Here die doodstraf.
Luister byvoorbeeld na Levitikus 20:10
En as
iemand owerspel doen met 'n man se vrou, owerspel doen met sy naaste se
vrou, moet hy en sy wat owerspel doen, sekerlik gedood word. (Levitikus 20:10 AFR1953)
In ‘n ander teks word bepaal dat mense wat bepaalde onkuise oortredings begaan, almal verbrand moet word.
Onkuisheid - oftewel egbreuk - is deur God vervloek.
- MAAR wat baie belangrik is, is dat ons nie die genade van God in hierdie geweldige sonde miskyk nie!
- God vervloek die sonde, maar nie die sondaar nie!
- Die genade het egter ook perke, want mense wat aan hierdie
sonde vaskleef, kan later nie meer van die vloek afgeskei word nie.
- So gaan die mens wat aan hierdie sonde vaskleef uiteindelik saam met die sonde verlore.
As ons besin waarom die Here so ernstig is met sy vervloeking van hierdie sonde, leer ons die volgende:
- Die eerste is dat hierdie sonde die siel en die liggaam van die mens verderf.
- God het elkeen na sy beeld geskape en dit veronderstel dat ons God se heiligheid ook moet verbeeld.
- Ons moet in ons hele lewe - ook ons geslagtelike lewe - net so onberispelik wees soos wat God self is.
Egbreuk skei die mens se siel van God af, want die onreinheid van hierdie oortreding beteken verbreking met God.
- Die rede is voor die hand liggend: Ons liggame is tempels van God en Hy woon nie in besmette tempels nie!
- Die Here leer ons dat Hy nie wil sien dat ons liggame met
skande bevlek word nie, want dis sy tempels wat vir Hom heilig
is.
- Die Heilige Gees woon daarin en daarom moet ons dit suiwer hou en bewaar.
- Daarby is hierdie sonde ‘n skending van die hoogste en heiligste wat die Here aan die mens in sy lewe gegee het.
- Die Here het juis die huwelik ingestel en verorden om
daarmee die geestelike gemeenskap met God in ons omgang te
simboliseer.
- Dit is ook waarom die Here die sonde van afgodery noem: “Weghoereer” van Hom af!
- Die volgende rede waarom hierdie sonde ons verbreking met God bewerk, is omdat dit die instellings wat God gegee het, bederf.
- Die huwelik is werklik die heel eerste samelewingskring wat God instel.
- Dit is bedoel om die fondament te wees waarop die hele
wêreldgeskiedenis en letterlik die hele ontwikkeling van die mens
moet rus.
- As die huwelik in duie stort, is dit heeltemal vanselfsprekend
dat die kerk en elke vlak waar die mens beweeg, hierdeur geraak gaan
word.
- Alles wat verbind word aan hierdie ortreding sal met swakheid en ellendes belaai word.
- Die derde rede waarom die Here baie beslis is oor hierdie sonde, is omdat mense mekaar verderf deur hierdie sonde.
- Onkuisheid lei altyd tot verdere sondes. Daar is die een
of ander tyd ‘n vorm van bedrog by betrokke - dikwels
leuens.
- Jaloersheid en haat wat uit sulke sondes voortkom lei soms tot moord - dink maar aan Dawid en Batseba se geval.
Uit al die dinge
is dit duidelik dat onkuisheid die mens so besmet dat hy sy beeldskap
van God - sy hoogste mooi - nie kan vertoon
nie. Dit is waarom die Here ook mettertyd sy genade van hierdie
mense af terugtrek - so dat in die laaste verse van die
Bybel staan dat die hoereerders buite die koninkryk van God staan.
Die eerste twee mense skepping en dus ook hulle opdrag dien as voorbeeld.
- Daarin lê die Here die beginsels vir die toekoms vas. Die Here maak een man met een vrou.
- Hy beveel dat hierdie huwelik in liefde moet wees.
- Hulle moet hulle lewensaktiwiteite rondom mekaar rangskik tot eer van die Here.
- Die doel van die huwelik is ook dat hulle hulle bestemming na God toe saam moet uitwerk.
Hierdie sonde het natuurlik ook ‘n verborge kant. Soms dink ons
dat ons nie sonde doen nie as ons nie die verkeerde daad letterlik doen
nie. Om die saak reg te stel - en dit raak alle
sondes - het die Here Jesus eenkeer die volgende uitspraak
gemaak:
Julle
het gehoor dat aan die mense van die ou tyd gesê is: Jy mag nie
egbreek nie. Maar Ek sê vir julle dat elkeen wat na 'n vrou
kyk om haar te begeer, reeds in sy hart met haar egbreuk gepleeg het. (Matteus 5:27-28 AFR1953)
Dis maar net verkeerde
gedagtes. Net jy en die Here weet daarvan. Tog beslis die Here
dat dit egbreuk is. Ons moet dus maar ons gedagtes in toom hou!
Die sewende gebod is nie net negatief nie.
- Dis ook ‘n positiewe versugting van die gelowige dat hy altyd suiwer wil bly.
- Hy hoor elke keer nuut die eis van God sodat dit hom kan waarsku en sterk maak omdat die sonde elke dag vir elke mens loer.
- Hierdie gebod is dus ‘n krag wat ons tot gebed aanspoor om vir onsself en vir mekaar te bid!
- Hierdie gebod het ook ‘n opvoedingsroeping.
- Ons het kinders en kleinkinders wat grootword. Ons moet
hulle van hulle eerste besef af leer dat hierdie gebod hulle leer om
alle vorme van liggaamlike heiligheid na te jaag!
- Hulle moet nie net hulle geloofsroeping teenoor God verstaan
nie. Hulle moet ook hulle liggaamlike roeping teenoor God
verstaan.
- Hierdie gebod werk ook deur in ons ontspanning.
- Dink nou eerlik aan al die sekstonele wat ons op film en op TV sien.
- Dink aan al die koerantberigte en tydskrifte met twyfelagtige inhoud.
- As ons nie op hierdie terrein onderskei nie, maak dit ons mak vir die verkeerde en dis brokkel ons beginsels op.
- Later is sulke dinge nie meer vreemd nie, en dan kan dit makliker deel word van ons eie bestaan.
Onthou dat die soendood van die Here Jesus Christus dit vir ons
moontlik maak om baie teer met die teenoorgestelde geslag om te gaan
sonder om sonde te doen.
- Dink hoe teer Hy die vroue rondom Hom hanteer het en hoe teer die
weduwees en die vrouewerksters in die eerste Christengemeentes hanteer
is.
- Maar dan is daar ‘n streep waaroor jy nie mag gaan nie
- en dis die gehoorsaamheid aan God om onder alle omstandighede
respek vir jou eie liggaam en die van ander mense te hê.
Dit moet jou weerhou van onkuisheid.
Onthou ook dat hierdie sonde nie ‘n doodsonde is nie: Daar is ‘n
terugdraai kans as sulke mense tot bekering kom. Voorbeelde is
volop in die Bybel - dink maar aan Ragab!
Die beeld wat ons
moet uitdra is dat ons as kerk - en daarom is elke individu
van ons daarby ingesluit - die Bruid van Jesus Christus
is. Hy soek ons maagdelik rein vir sy wederkoms (huwelik).
Laat ons dan so leef dat die Heilige Gees Hom verlustig om in ons liggame te woon.
Kom ons lees Kategismus Sondag 41 saam.
Amen.
Slotgebed.
Slotpsalm 136:1, 2.
Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.
Dr. M.J. du Plessis
Gereformeerde Kerk Bellville
Datum: 26 Januarie 2003.