Sing vooraf: Psalm 91:1, 4
Ons begin hierdie ontmoeting met God deur openlik teenoor mekaar en teenoor
God te verklaar:
Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige
werking van God die Heilige Gees.
Amen.
Lofpsalm 89:1
Geloofsbelydenis: Nicea
Na die wet bely ons voor God ons sondeskuld en bid vir vergewing van ons
sondes met Ps. 40:4.
Wet
Psalm 40:4
Gebed
Psalm 146:8
Skriflesing: 2 Johannes 1
Teks:
2 Johannes 1:8
Wees op julle hoede, dat ons nie verloor wat ons deur arbeid verkry het nie,
maar 'n volle loon ontvang. (2 Johannes 1:8 AFR53)
'n Kerk skryf 'n brief aan 'n ander kerk. Dit is 'n brief wat getuig van liefde en respek,
omdat die een kerk getuig dat hulle sien dat die ander kerk se lidmate hulle onderskei van die
ongelowiges. Hulle word bemoedig om in die gebooie van die Here te wandel.
Johannes noem homself met 'n besondere naam: oudste of ouman.
- Die woord beteken ook ouderling.
- Johannes was in hierdie stadium inderdaad al 'n ou man, maar hy was nie presies 'n
ouderling nie. Hy was 'n apostel.
Waarom gebruik hy dan die woord ouderling of oudste om homself mee te benoem?
- Om daarmee sy eenheid met sy gemeente aan te toon.
- Hy sien homself in die eenheid van die geloof as deel van die gemeente - waarskynlik die
gemeente van Efese.
Ons gee in hierdie preek aan die volgende twee sake aandag:
1. Die lewe van die uitverkore vrou
2. Verootmoediging teenoor die andersheid van die wêreld
1. Die lewe van die uitverkore vrou
Die brief word geskryf aan iemand baie spesiaals: 'n uitverkore vrou.
- Dit klink in Afrikaans so maklik om dit te sê, maar die woord wat ons met vrou vertaal, beteken nie regtig vrou nie.
- Dit is 'n vroulike vorm van die Here se naam. Die Here word in die Nuwe Testament
Kurios genoem, en hierdie vrou word Kuria
genoem.
Later, toe Johannes die Openbaringboek geskryf het, het hy nogal baie na hierdie vrou
verwys. Luister na die volgende aanhaling:
Openbaring 19:7-9:
Laat ons bly wees en ons verheug en aan Hom die heerlikheid gee, want die
bruilof van die Lam het gekom en sy vrou het haar gereed gemaak. En aan haar is gegee om
bekleed te wees met rein en blink fyn linne, want die fyn linne is die regverdige dade van
die heiliges. Toe sê hy vir my: Skryf salig is die wat genooi is na die bruilofsmaal van die
Lam. En hy sê vir my: Dit is die waaragtige woorde van God. (Openbaring 19:7-9
AFR53)
In Openbaring 21 word die Nuwe Jerusalem die bruid van die Here genoem - dan word daar nie net
na die stad se mure en poorte verwys nie.
- Daar word veral verwys na die mense daarin en dat God by hulle sal woon en dat hulle sy
volk sal wees (21:3, 4).
- Die bedoeling is so duidelik dat die vrou van wie Johannes elke keer praat as hy praat
van die vrou van die Here of van die bruid van die Bruidegom of van die uitverkore vrou, die
kerk van die Here is.
Die naam wat Johannes vir die vrou gee in 2 Johannes vers 1 is baie belangrik:
- Dit is 'n vroulike weergawe van die Here se naam Kurios. Kurios
beteken iets soos Die Heerser en Oorwinnaar in sy majesteit.
- Die vroulike vorm van die woord, soos wat dit in 2 Johannes staan, dui die kerk aan as
die bruid van die Here wat heerseres is oor die wêreld en die sonde.
- Die naam dui verder aan dat sy dit nie uit haarself is nie, maar dat sy dit is kragtens
haar verbintenis met God.
Die besondere naam is bedoel om die gemeente te herinner aan haar hoë adel en haar hoë
roeping.
- Die naam is nog meer belangrik omdat dit profeties wys na die wederkoms,
- en na die lewe wat daar op die kerk van die Here wag in die hiernamaals.
Uit die brief van Johannes aan die betrokke gemeente (uitverkore vrou) is dit duidelik dat
die gemeente wat die brief skryf, dit ervaar dat hierdie besondere gemeente in staat is om
voluit te lewe in die genade en liefde van die Here:
Ek was baie bly dat ek van u kinders gevind het wat in die waarheid wandel,
soos ons 'n gebod van die Vader ontvang het. (2 Johannes vers 4 AFR53)
Hierdie vers verwys na elke gelowige afsonderlik.
- In die strate van die dorpie waar Johannes van die lidmate raakgeloop het, was daar iets
aan hulle wat hulle dadelik en uitkenbaar anders gemaak het as die heidene wat saam met hulle
gewoon het.
-
- In die ware gelowiges lewe daar 'n innerlike gesteldheid wat die krag van God is.
- Hulle lewe elke dag met hierdie geloof en uit die ware geloof.
Daarom ontvang hierdie kerk van die Here so 'n uitgebreide seën oor hulle: genade, barmhartigheid en vrede . . .
- Genade is die guns van God.
- Barmhartigheid is die bewoënheid waarmee die Here ons uit ons ellendes uithelp.
- Vrede is welvaart wat berus op die salige gemeenskap wat die gelowige met God onderhou.
Jy kan die vrede van God eers ken, nadat jy die God van vrede leer ken het.
- Dit is presies waar die probleem vir die moderne tyd se kerke ontstaan het.
- Al die dinge wat aangeprys word by hierdie kerk van die Here aan wie die brief geskryf
word, ontbreek by die grootste gedeelte van die wêreld se inwoners.
- Daarom bid ons so baie dat wreedheid, geweld en haat tog asseblief aan bande gelê moet
word en, as dit moontlik is, dat dit tog tot 'n einde kan kom.
2. Verootmoediging teenoor die andersheid van die wêreld
Dit sal nie help om tekere te gaan oor die sondes van al die ander mense van ons land nie, want
die grootste gros van die mense wat die Here nie as God wil erken en bely nie, en daarom dinge
doen wat teen die wil van die Here is, is nie vandag iewers in 'n erediens nie.
- Tog neem dit nie die feit weg dat ons eerlik belydenis moet doen dat al die verkeerde
dinge, soos onder andere Sondagsport, Sondaghandel, geweld en haat wat rondom ons gebeur,
sonde is nie.
- Ons opregte belydenis as 'n gemeente is ook vandag dat ons weet en ervaar dat daar baie
verkeerde dinge in ons land gebeur wat vir die Here uiters aanstootlik is.
Maar dan moet ons gemeente se belydenis verder gaan as dit.
- Ons moet met woord en daad bely dat ons die Here waarlik ken.
- Ons moet voor die Here bely dat ons in hierdie ware geloof eerlik sal volhard - ons wil
Hom dien, dag en nag, en wanneer Hy kom, sal Hy ons vind waar ons Hom steeds getrou aanbid.
Wat het die heidene nie gehad nie, wat die gemeentelede vir wie die brief geskryf is, wel
gehad het?
- Hulle het nie die waarheid om God lief te hê en te dien, leer ken nie (v.1).
- Hulle het niks van die ewige saligheid en waarheid wat in hulle bly en wat ewig by hulle
is nie (v. 2).
- En hulle lewens wys dit.
Daarom word hierdie uitverkore vrou en haar kinders gewaarsku dat hulle moet lewe volgens
al God se gebooie. Hulle moet anders wees en anders bly as die wêreld en sy mense.
- Daar is verleiers in die wêreld. Die woord wat in Grieks gebruik word, beteken letterlik
dwaalsterre - mense wat die valse lig versprei.
- Dieselfde woord word net daarna gebruik om te sê wie en wat die antichris is: 'n
verdwaalster, of 'n verdwaalgees wat die Here Jesus
Christus teëstaan.
Die Here onderstreep hier weer die feit wat op ander plekke in die openbaring van die Here
ook voorkom, naamlik dat die dwaalleraars Jesus Christus nie reg verkondig nie:
- Hulle verkondig Jesus nie soos wat God Hom geopenbaar het, en soos wat Hy werklik was toe
Hy op die aarde was nie.
- Hulle ontken dat Jesus liggaamlik op die aarde was. Hier het ons te doen met die
doodgewone heidendom.
Maar u moet dit nie losmaak van die voorafgaande verse nie.
- Wat gebeur met mense wat nie in Jesus Christus glo nie, of wat nie op die regte manier in
Hom glo nie?
- Hulle verval in ongehoorsaamheid en in 'n onvermoë om in die liefde van God te kan lewe.
Dink nou mooi wat dit alles beteken. Dit is nie waar dat dit net beteken dat daar 'n
verval in die kerk intree nie.
- As jy ongehoorsaam is aan die gebooie van die Here, beteken dit dat gehoorsaamheid aan al
tien die gebooie platval.
- Baie prakties beteken dit dat daar 'n wanverhouding tussen die Here en sulke mense kom -
die eerste vier gebooie.
- Maar dit beteken ook dat daar 'n wanverhouding ten opsigte van die laaste ses gebooie
kom.
-
- Uiteraard moet gesagsverhoudings in gedrang kom - die sesde gebod.
- Dit kan nie anders nie as dat moord en diefstal ook moet gebeur nie.
- Sedelike verval is ook ingesluit, want verbreking van huwelike en sedeloosheid sowel
as veragting van die waarheid (valse getuienis) is alles dinge waaroor dit hier gaan.
Die Here gee duidelike opdragte aan hierdie uitverkore kerk van Hom - en daarom ook aan
ons:
- Bly by die waarheid.
- Pasop vir dwaalleraars en dwaalleer.
- Moenie jou seën oor hulle optrede uitspreek nie.
Die duiwel is besig om 'n gees in die wêreld rond te strooi wat leer dat almal almal moet
verdra, ongeag wat hulle doen en wat hulle glo.
- In hierdie brief - vers 10 en 11 - leer die Here dat jy mense met sulke valse leer (en
alles wat daarmee saamgaan) nie in jou huis moet ontvang nie en selfs nie moet groet nie,
anders het jy deel aan hulle werke.
Dit is tog duidelik dat die Here met die woord huis sy
kerk bedoel. Dit is die blyplek van die uitverkore vrou aan wie die
brief geskryf word.
- Moenie ongelowiges en mense met allerhande dwaalleer in die kerk opneem of huisves nie.
- Op die kerkraad rus'n baie swaar plig wat geweldige onderskeidingsvermoë eis.
- U is die persone wat deur God geroep word om in tye soos waarin ons nou lewe, die kerk
van die Here suiwer te hou.
Die opdrag van die Here betreffende die groet van sulke onheilige persone raak die groet
soos dit in vers 3 staan.
- Die seën van die Here - genade, barmhartigheid en vrede - mag nie oor sulke mense
uitgespreek word nie.
- Ons mag ons nooit vereenselwig met al die godsdiensvervlakking rondom ons nie, en ook nie
met die mense wat die Christelike godsdiens vervlak nie.
Die oordeel van die Here word dadelik aangekondig oor mense wat nie by die ware evangelie
bly nie:
- Dit wat hulle deur hulle arbeid verkry het, word verloor. Waar die duiwel toegelaat word
om sy werk te doen, vernietig hy alles wat die gelowiges het.
- Hulle verloor die evangelie. En daarmee saam alles wat goed en reg was in hulle totale
samelewing - soos wat ons dit sien gebeur.
Daarteenoor is die volle loon wat ontvang word waar daar in die suiwer
leer volhard word, die volmaakte verlossing in Jesus Christus.
Wat moet ons doen? Ons moet ons geloof bely, en ons opnuut daartoe verbind om aan die Here
gehoorsaam te wees.
- Dan sal ons die vrede van God ken.
- Die vrede wat berus op die salige gemeenskap met God.
- Hierdie vrede van God sal eers oor ons kan kom nadat ons almal wat hier woon die God leer
ken het wat ewige vrede gee.
Ons moet opreg bely as 'n gemeente dat ons weet en ervaar dat daar baie verkeerde dinge
rondom ons gebeur wat vir die Here uiters aanstootlik is.
- Maar ons moet sorg dat ons nie deel daarvan uitmaak nie.
- Ons bely voor die Here dat ons in die ware geloof eerlik sal volhard: ons is nie soos die
kerkloses, kerklosses, doodmakers en verwaandes nie.
- Ons dien die Here dag en nag totdat Hy kom. Die Here sal ons vind waar ons Hom steeds
getrou aanbid.
Miskien sal die Here ons spaar.
- Hy het vir Abraham gesê dat Hy Sodom en Gomorra sou spaar as daar vyf regverdiges was.
- Miskien sal die Here ons land spaar ter wille van die ware gelowiges wat soos die
uitverkore bruid van die Here oor die sondes heers.
Al gaan dit hoe sleg, kom ons kyk by al die bloed op die strate verby na die bloed van
Jesus Christus aan die kruis.
- Ons is in Christus beklee met hemelse heerlikheid.
- Kom ons bly die suiwer kerk van Christus en ons bly biddend op ons knieë waar ons die
Here bid om ons ons sondes te vergewe, al sou ons moes ly.
- Kom ons leef biddend totdat ons die volle loon van die Here Jesus ontvang.
Amen.
Slotgebed
Skrifberyming 31:2, 3 (7-1:2, 3)
Die genade van die Here Jesus Christus en die liefde van God en die gemeenskap van die Heilige
Gees bly by u almal.
Amen.
Dr MJ du Plessis
Gereformeerde Kerk Bellville
Datum: 12 Junie 2005 (oggend)