2 ...verkondig die woord; hou aan tydig en ontydig
10 ...Want Demas ...het die wêreld liefgekry...

• eerste wys dit daarop dat Jesus die Regter is wat gaan oordeel oor die dooies en die lewendes.
• Tweedens wys dit daarop dat die oordeel sowel as die koninkryk kom wanneer Jesus weer verskyn.
• Die doel van die eed is om elke gelowige te laat besef dat jy jou hele lewe moet inrig met die oog op die koningskap en die verskyning van die Here Jesus.

• Die opdrag gaan uit na elke gelowige toe - nie net na mense soos predikante, ouderlinge of diakens toe nie.
• Alle ware gelowiges se lewens moet staan in die teken daarvan dat hulle die Woord van die Here verkondig met dit wat hulle sê en dit wat hulle doen.

• Is Woordverkondiging regtig so gewigloos dat daar nie so 'n swaar eedswering nodig is as die Here die opdrag aan ons gee nie?
• Dink veral daaroor as ons vers 2 verder lees:
•     ... hou aan tydig en ontydig ...
•     ... weerlê, bestraf, vermaan ...
•     ... in alle lankmoedigheid en lering.

• Wie van ons wat die Here Jesus Christus as God en Verlosser bely kry dit reg om met eindelose geduld die eer van die Here te verdedig?
• Wie van ons wat die Here Jesus Christus as God en Verlosser bely kry dit reg om vriend of vyand in die grootste liefde te bestraf.
• Wie van ons wat die Here Jesus Christus as God en Verlosser bely kry dit reg om sonder om self moeg te word iemand anders te troos en te leer?
• En dan, terwyl ons al hierdie dinge doen, elke oomblik die erns van die wederkoms en van die oordeel van Jesus Christus te onthou en na te streef?

• Die wêreld het nie 'n eindverwagting nie.
• Die wêreld dink dat hy nog besig is om in homself te groei en in sy krag en kennis al hoe sterker te word.
• Kyk maar rondom u en dan sal u sien dat daar 'n geweldige heftige stroomversnelling in alles is: die natuurwetenskappe, mediese wetenskappe, asook in die politiek. Daar is tans wêreldwyd selfs 'n versnelling in geweld.

• Dit beteken net dat die wêreld die geaardheid aangeleer het om van die Here en alles wat vir Hom belangrik is, af te sien.
• Die invloed van hierdie geestesstroming word altyddeur sterker, en dit sleep elke dag al meer mense saam. Ook mense in die kerk.

• U, broeders en susters wat vanaand u geloof voor God bely, moet die erns van hierdie belydenis wat u voor God doen, baie goed verstaan.
• Die Here bedoel beslis nie dat ons ons gevoel vir beskeidenheid of ons maniere oorboord moet gooi en mense onvoorwaardelik moet storm met die Bybel nie.
• Die tydig en ontydig wat hier staan, het nie betrekking op die mense wat bepreek moet word nie.
• Dit beteken nie dat jy tydig en ontydig op mense moet toeslaan nie.
• Die woorde slaan op die mens wat die Woord verkondig. Ons wat God bely, word hier aangepraat:
• Jy moet nie wanneer daar geleentheid is om die Woord van die Here te verkondig, te lui wees, of jou eie belange vooropstel nie.
• Die Here verwag van ons dat daar nie iets soos traagheid of gemaksug in ons moet wees wat ons terughou om sy lof te verkondig nie.
• Geen geleentheid moet vir jou ontydig wees nie.

• Dalk het hy gedink dat Paulus maklik kan praat, want Paulus was 'n geleerde man met besondere gawes.
• Daarteenoor was Timoteus maar net 'n eenvoudige predikant. Hy het nie soos Paulus briewe geskryf nie. Hy het ook nie baanbrekerswerk gedoen nie. Hy het nie kerke gestig nie.
• Hy het selfs die grootste moeite gehad om maar net in die bediening te bly, want die Efesiërgemeente het hom so moedeloos gehad dat hy sy goed wou vat en loop. Paulus moes hom eintlik vermaan om voort te gaan met sy werk!

• Jy hoef nie 'n besonder begaafde apostel soos Paulus te wees om in botsing te kom met die wêreld nie.
• Jy hoef net eerlik in jou geloof te wees.

• Daar kom 'n tyd wanneer die mense nie meer die gesonde leer sal verdra nie.
• Ons weet dat daar verskillende plekke in die Bybel is wat oor hierdie saak 'n uitspraak maak.
• Al die uitsprake maak dit ook duidelik dat dit al hoe erger sal word al hoe nader die wederkoms kom.

• Die Here waarsku ons hier dat daardie mense preke wil hoor wat met hulle eie wense ooreenkom.
• Hulle wil dinge hoor wat hulle oor streel en wat pas by hulle eie begeertes.
• Merkwaardig dat die Here openbaar dat die mense selfs bereid is om deur die selfstrelende en bespiegelende mitologie ingesluk te word.
• Hulle wil nie meer suiwer prediking hoor nie  -  hulle wil vermaak word in die kerk.

• Daar sal baie wees, want hulle sal 'n menigte predikante beroep wat by hulle nuwe geloofsmaak pas.
• Die Here laat Paulus 'n voorbeeld van een so 'n kerkmens wat weggeloop het van die ware godsdiens af, opskryf: Demas.
• Demas het die wêreld liefgekry.
• Dis 'n ernstige situasie, want hierdie man het katkisasie opleiding gekry onder Paulus se leiding.
• Hy het elke keer in die diens gesit as iemand soos Paulus gepreek het.
• Tog het hy weggeloop na sy geboortestad toe en die kerklike lewe vaarwel toegeroep.

• Die mense self besef dit nie  -  vir hulle is daar baie argumente waarmee hulle sal probeer bewys dat hulle godsdiens en hulle geloofslewe verdiep en dat hulle die Here beter dien.
• Tog sien die Here die saak anders: hulle wil nie die gesonde leer verdra nie.

• Daarteenoor stel die Here "die gesonde leer."
• Daar is net een ware geloof en een gesonde leer.
• Daarom noem die Here dit "die" gesonde leer.
• Enige iets wat afwyk van die leer af soos wat God dit helder en suiwer openbaar, is dwaalleer.

• Mense begin in die roes en waan lewe dat die kerk vir hulle meer moet bied.
• In plaas daarvan dat hulle as mense diensbaar bly in hulle aanbidding aan die Here, wil hulle hê dat die kerk 'n soort van 'n organisasie moet wees wat hulle ter wille moet wees.
• Die werklike diep besef dat die kerk die liggaam van die Here is, gaan al hoe meer verlore.

• Daarom moet ons belydenis van die Here 'n duidelike bewys wees dat ons in die volle gehoorsaamheid aan die Here en aan die Woord van die Here lewe.
• Die Here spreek ons ook so aan in vers 5: Maar wees jy in alles nugter! Leef in die helder werklikheid dat jy die Here van harte dien.
• Noodwendig gaan dit beteken dat die mense wat van die Here af wegval, jou gaan minag.
• Maar die Here moedig ons aan om daardie tipe verdrukking te ly. Solank ons net vol is en oorloop in ons diens aan die Here.

…soos Hy ons in Hom uitverkies het voor die grondlegging van die wêreld om heilig en sonder gebrek voor Hom in liefde te wees,  deurdat Hy ons voorbeskik het om ons as sy kinders vir Homself aan te neem deur Jesus Christus, na die welbehae van sy wil,  tot lof van die heerlikheid van sy genade waarmee Hy ons begenadig het in die Geliefde. (Efesiërs 1:4-6 AFR1953)

• Elkeen van ons is voor die skepping al uitverkies.
• Daarna is ons deur die ewige almagtige God verklaar as sy verbondseiendom toe ons gedoop is.
• Daarna het die meeste van ons, soos hierdie jong broeders en susters vanaand, ons met 'n openbare belydenis verbind tot volle aanbidding aan die ware God.
• Ons bely juis ons geloof omdat God die Heilige Gees ons van die waarheid van ons verlossing en van die grootheid van God oortuig!
• Bly daarby en moenie dat die wêreld  u verlei om uself eerder as God te dien nie.
• Waak nog sterker dat u nie die kerk van die Here staan en ombuig in 'n menslike organisasie wat mense begin streel, i.p.v. God eer nie.