Dr. M.J. du Plessis Gereformeerde Kerk Bellville Datum: 30 Maart 2003 (oggenddiens).

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 145:1, 12.

Geloofsbelydenis
Wet

Psalm 38:1, 17.

Gebed.

Psalm 50:11.

Skriflesing: Hebreërs 1.
Teks: Hebreërs 1:3

Hy, wat die afskynsel is van sy heerlikheid en die afdruksel van sy wese en alle dinge dra deur die woord van sy krag, nadat Hy deur Homself die reiniging van ons sondes bewerk het, het gaan sit aan die regterhand van die Majesteit in die hoogte,…

Die Here is 'n God van genade. Hy het ons ook lief en Hy het self voorsiening gemaak dat al ons sondes gestraf en vergewe is in die verdienste van Jesus Christus, ons Verlosser.

Saam met Jesus Christus se versoening het ons ook nog die leiding van God die Heilige Gees as gawe gekry.
Daarom duld die Here dit nie dat iemand al hierdie genade vertrap nie.

Ons gee in hierdie preek aandag aan die volgende:
1. Wie is Jesus Christus die Here?
2. Hoe word Hy aanbid?

1. Wie is Jesus Christus die Here?

Die Here Jesus openbaar Hom as volledig God en volledig mens. As mens het Hy saam met ons op die aarde gelewe en gesterf om vir ons sondes versoening te doen. Hy het met sy menslike liggaam weggevaar hemel toe.

Ons kry in die Efesiërbrief 'n lang lys van dinge wat God deur Jesus Christus se kruisversoening aan ons gegee het:

Ons ontvang geestelike seëninge.
Ons is uitverkies om heilig te wees.
Ons is verordineer tot kinders van God.
Ons sondes is vergewe.
Die Here Jesus begenadig ons met wysheid en insig.
Hy openbaar dat ons bestemming is om sy heerlikheid te prys.
Hy verseël ons met die Heilige Gees as sy eiendom.
Hy verlos ons en laat ons die ewige lewe beërf.

Al hierdie dinge wat die Here vir ons gegee het, wys net hoe groot en aanbiddingswaardig die Here is. Vir sulke groot genade moet die gelowiges die Here bewonder en dank (vgl. Efesiërs 3: 14vv.; Efesiërs 4: 1vv.).

Die feit is dat Jesus Christus die Seun van God nie meer ‘n mens op die aarde is nie. Hoe en Wie is Hy nou?

Hebreërs 1:3 openbaar dat Hy

die afskynsel is van God se heerlikheid
en die afdruksel van sy Wese.
Hy dra alle dinge deur die woord van sy krag,

Ons lees in Kolossense 1:18 dat Hy die Hoof van die liggaam, naamlik die gemeente is.

Hy is die begin,
die Eersgeborene uit die dode.
Hy is in alles die eerste.

Efesiërs 1: 22 beklemtoon dit nog sterker dat God alle dinge aan Jesus se voete onderwerp het, en Hom as Hoof bo alle dinge aan die gemeente gegee het.

Dit beteken dat God Hom openbaar as die God en Hoof van die Kerk en van alles wat geskape is.
Dit geld van sowel die sienlike as die geestelike wêreld (Kolossense 1:16).

Voor Jesus se hemelvaart het Hy aan die dissipels bekend gemaak dat daar niks is wat buite sy mag lê nie. Sy presiese woorde aan hulle was:
Aan My is gegee alle mag in die hemel en op die aarde. (Matteus 28: 18; Hebreërs 2: 8; 1 Korintiërs 15: 27).

Jesus Christus is ook God die Skepper (Kolossense 1: 16).
Ons lees in Johannes 1:3 dat alle dinge deur Hom ontstaan het, en dat sonder Hom nie een ding ontstaan het nie (Vgl. ook: Johannes 1:10; Hebreërs 1:2).
Alle dinge is deur Jesus en tot Jesus geskape.
Daar moet dus iets tot ons deurdring dat Jesus God die Almagtige is, en dat ons Hom nie sommer as ons gelyke kan behandel in ons aanbidding nie.
Ons kan Hom ook nie op enige profane manier aanbid nie.

Trouens, die Bybel openbaar dat Jesus God die Almagtige self is.

Jesus self sê: “Ek en die Vader is een.” (Johannes 10:30).
Die Bybel versterk hierdie uitspraak deur twee keer te sê dat Jesus die Beeld van die onsienlike God is (Kolossense 1:15; Filippense 2:6).

Van die ewigheid voor die skepping af was die Here Jesus al daar.

Dink veral aan die woorde van Kolossense 1:17

Voor alles was Hy al daar, en deur Hom bly alles in stand.

Of: en sy uitgange is uit die voortyd, uit die dae van die ewigheid (Miga 5:1).
Jesus self beroep Hom daarop in sy Hoëpriesterlike gebed:

Verheerlik U My nou ook by U, Vader, met die heerlikheid wat Ek by U gehad het voordat die wêreld bestaan het (Johannes 17:5; vgl ook: Johannes 8:58).

Die Here Jesus het nie sy gesag iewers in die verloop van die geskiedenis in die hande gekry (of verloor) nie. Die Bybel openbaar aan ons dat Jesus Christus is gister en vandag dieselfde en tot in ewigheid (Hebreërs 13:8).

Hierdie almagtige Jesus word deur God as Hoof bo alle dinge aan die gemeente gegee (v. 22).
Ons moet dus weet dat die almag van Jesus Christus ons sal beskerm, maar ook van ons verwag om Hom te aanbid met ‘n styl wat by sy majesteit pas (vgl. hierby Handelinge 2: 36 en Filippense 2: 9 - 11).

2. Hoe word die Here Jesus aanbid?

Waarom openbaar die Heilige Gees al die dinge?

Sodat ons nooit van Jesus menslik moet dink as ons Hom aanbid nie.
Al hierdie openbaringe (en nog meer) is dat die gemeente presies moet verstaan Wie Jeus die Here is.
Wie Jesus nie ken as die Here van die heerlikheid nie, kan baie ernstige foute maak, soos wat dit inderdaad in 1 Korintiërs 2: 8 gestel word:

Nie een van die heersers van hierdie wêreld het hierdie wysheid geken nie. As hulle dit geken het, sou hulle die Here van die heerlikheid nie gekruisig het nie.

Hierdie ernstige misdaad dat die mense Jesus gekruisig het, word direk aan geloofsdomheid toegeskryf.

Direk voor hierdie vers skryf Paulus dat hierdie wysheid deur God bestem is tot ons ewige heerlikheid.
Dit ondersrteep hoe belangrik dit is om die Here Self te ken en reg te aanbid (vgl. Efesiërs 1: 6, 12, 14).

Daar is sommer baie tekste in die Bybel waarin daar staan dat ons onsself moet heilig voordat ons die Here gaan aanbid. Dit laat mens wonder of almal van ons voorbereid is om die allerheiligste God te ontmoet as ons gejaagd in die erediens instorm en tydens die diens nie kan wag dat die dominee moet “Amen” sê nie.

Deur die eeue het die mense wat God se heiligheid werklik geken het, voor Hom neergeval wanneer hulle Hom aanbid het.

Soms was dit omdat hulle kragte bloot uit hulle liggame uitgevloei het, omdat hulle nie voor sy heerlikheid kon staan nie - soos Johannes op Patmos.
Ander kere was dit om God te aanbid, want hulle kon nie eers hulle arms optel nie. Hulle vrees en respek vir God het hulle op die aarde platgedruk.

Dit geld alle skepsele: mense en engele. Ons lees dat die Gerubs en die Serafs wat by die troon van God is hierdie selfde versigtigheid aan die dag lê:

Serafs het bo Hom gestaan; elkeen het ses vlerke gehad: met twee het hy sy aangesig bedek, en met twee het hy sy voete bedek, en met twee het hy gevlieg (Jesaja 6:2).

Die serafs het mekaar telkens toegeroep:

"Heilig, heilig, heilig is die Here die Almagtige! Die hele aarde is vol van sy magtige teenwoordigheid." (Jesaja 6:3).

Jesaja het vir sy volk gesê (8:13):
Die HERE van die leërskare Hom moet julle heilig, en laat Hy julle vrees en Hy julle verskrikking wees!

Die 1983 vertaling lees:

Julle moet die Here die Almagtige eer as die Heilige. Vir Hom moet julle vrees en vir Hóm moet julle bang wees.

Ons moet besef dat die aanbidding in die hemel net ‘n voortsetting is van ons aanbidding op die aarde.

Ons moet besef ons dat jy nie die Here hier op een manier kan aanbid, en eendag hierna op ‘n ander manier nie.
Ons aanbidding op die aarde moet dus dieselfde huiwering in hom hê as wat die engele in die hemele direk voor God se aanbidding het.

Dit is waarom die Bybel ons leer dat ons die HERE onse God moet prys.

Maar ons moet nie in ons aanbidding uitspattig en wêrelds raak nie.

Daar staan: Kom buig in aanbidding voor Hom: Hy is heilig! (Psalm 99:5).

Die Here openbaar baie duidelik dat Hy op 'n spesiale manier geken wil word.
Ons moet Hom ken soos wat Hy Hom in heerlikheid openbaar.
Ons kan Hom nie maar ken en dien soos ons wil nie.

Die Here verwys eenkeer na mense wat baie verwaand is, en allerhande uiterlike dinge doen wanneer hulle aanbid, maar nie hulle eie sondes raaksien nie. Hy sê dan:
Hierdie mense is 'n rook in my neus, 'n vuur wat die hele dag brand. (Jesaja 65:5).
Sulke mense maak die Here woedend. Hulle laat sy toorn losbreek.

As ons baie nugter oor hierdie dinge dink, besef ons waarom daar in die Hebreërbrief geskryf staan dat dit vreeslik is om te val in die hande van die lewende God (Hebreërs 10: 31).

Dit is asof die Heilige Gees ons vir laas nog weer onder die besef wil bring dat ons groot en ernstige moeilikheid gaan hê wanneer ons die Here verag en Hom opsetlik verkeerd aanbid.
Daarom sê Hy: Vreeslik is dit om te val in die hande van die lewende God.

Anders gestel: Die volle krag van Jesus se kruisdood en van die werking van die Heilige Gees is reeds oor ons gevestig.

Ons is reeds uit die sonde uitgeruk en as nuwe mense in die genade van God ingeplant.
Daarom word die waarskuwing so ernstig gestel dat ons nie moet dink dat ons ‘n wil het wat ons teenoor God se wil kan stel nie.
Ons kan nie oor ons styl en manier van aanbid gaan besluit en dit dan anders doen as wat die Here vir ons voorskryf nie.

Ons hoef nie te twyfel aan die vermoëns van hierdie krag van God wat in ons werk nie.

Dit is Jesus se krag wat in ons werk en dit is onkeerbaar. Dink daaraan soos wat dit hier geskryf staan:

God het Jesus Christus oor alle dinge gestel (vgl 1 Korintiërs 15: 27).
Al die magte wat aan Jesus onderwerp is, is dus verplig om tot beskikking vir aanbidding aan die Here Jesus te wees.

Net so is die engele onder die beheer van Jesus Christus en moet hulle Hom aanbid en dien.
Hulle moet volkome gehoorsaam wees aan Hom. Dink hier byvoorbeeld aan Hebreërs 1: 14 waar die volgende geskryf staan:

Is hulle (die engele) dan nie almal geeste in diens van God, wat Hy uitstuur om die te dien wat die saligheid gaan beërf nie? (Vgl. ook: Matteus 16: 18).

Hoe aanbid ons? Met menslike gejuig, of met die grootste versigtigheid en selfs vrees? Kom ons gaan kyk hoe het die Heilige Gees die mense van die begin van ons tyd af gelei om te aanbid.

Ons lees dat hulle in die tyd van Enos het die mense begin om die Naam van die Here aan te roep Genesis 4:26). Daar word nie gesê hoe hulle dit gedoen het nie.
Later lees ons in Genesis 24:48 dat Abraham se slaaf sê:

...en ek het my in aanbidding neergebuig voor die HERE en die HERE geloof, die God van Abraham, my heer, wat my op die regte weg gelei het om die dogter van my heer se broer vir sy seun te gaan haal.
Daarvandaan af loop hierdie refrein deur die Bybel dat die mense uit ontsag voor die Here neergebuig het om Hom te aanbid:
Wanneer die hele volk die wolkkolom by die ingang van die tent van ontmoeting sien staan, het elkeen by die ingang van sy tent gebuig in aanbidding (Eksodus 33:10).
Soms het die hele volk in ‘n vergadering saamgekom en gebuig wanneer hulle aanbid:

Terwyl die sang weerklink en die trompette skal, het die hele gemeente in aanbidding gebuig. Dit het alles aangehou tot die offer afgehandel was (2 Kronieke 29:28).

Later is hierdie gebruik in die tempel ook voortgesit. Ons lees byvoorbeeld in Psalms 99:5:

Verhef die HERE onse God, en buig julle neer voor die voetbank van sy voete. Heilig is Hy!

In Psalm Psalms 132:7 staan dit nog duideliker geskryf:
Kom ons gaan sy woning binne, kom ons buig daar in aanbidding voor Hom.

As ons deur die boek Openbaring lees, is daar verskillende plekke waar daarna verwys word dat tot alle skepsele in die hemel voor die Here neerval en aanbid:

En die vier en twintig ouderlinge en die vier lewende wesens het neergeval en God aanbid wat op die troon sit, en gesê: Amen, Halleluja! (Openbaring 19:4).
En die vier en twintig ouderlinge wat voor God op hulle trone sit, het op hulle aangesig geval en God aanbid (Openbaring 11:16).
En al die engele het rondom die troon en die ouderlinge en die vier lewende wesens gestaan, en hulle het voor die troon op hulle aangesig neergeval en God aanbid (Openbaring 7:11).
En die vier lewende wesens het gesê: Amen! En die vier en twintig ouderlinge het neergeval en Hom aanbid wat lewe tot in alle ewigheid. (Openbaring 5:14; Openbaring 4:10).

Daar is een baie opvallende saak regdeur die Bybel, en dit is dat die Heidene altyd baie raserig was wanneer hulle hulle afgode aanbid het.

‘n Baie bekende voorbeeld is die Baälprofete wat ‘n hele dag lank op Karmel geroep het en hulleself opgesweep het totdat hulle hulleself later stukkend gesteek en stukkend gekerf het.
Nog ‘n voorbeeld is Babel. Babel is die simbool van alles on onregverdig is en uiteindelik is dit die vesting van die Antichris. Ons lees in Jeremia 51:55 dat die Here Babel verwoes en 'n einde maak aan sy geraas.
Ons lees dat die gelowiges ook soms ook raserig geraak het by die altaar. Hulle het dit laat klink soos ‘n feesdag (vir ons sal dit dalk na ‘n baie goeie ding lyk!). Dan staan daar die volgende hieroor geskryf:
Die Here het sy altaar verwerp, sy heiligdom ontheilig, die mure van haar paleise in die hand van die vyand oorgelewer; hulle het gedruis gemaak in die huis van die HERE soos op 'n feesdag (Klaagliedere 2:7).
In die nuwe vertaling staan daar geskryf dat hulle in die huis van die Here gejuig het asof dit sy volk is wat daar fees vier.

Hierdie voorbeelde sluit aan by die Here se openbaring reg van die begin af, want Adam en Eva het die stem van die HERE God gehoor terwyl Hy wandel in die tuin in die aandwindjie (Genesis 3:8).

Toe Elia in die grot op die berg was, was die Here nie in die groot en sterk wind wat die berge geskeur en die rotse verbreek het voor die HERE uit nie. Die HERE was ook nie in die aardbewing nie. Daarna was die HERE ook nie in die vuur nie. Die Here was in die fluistering in die windstilte (1 Konings 19:11, 12).

Met elke erediens moet ons die Here ook in hierdie styl aanbid.

Ons kom bymekaar in eredienste, waar ons weer voor hierdie Almagtige God gaan verskyn om Hom met huiwering en eerlike belydenis van ons sondes te aanbid.
Ons kom saam omdat sy verlossing elkeen van ons by die volheid van God se almagtige verlossingsraad betrek.

Die Here het ons aan die kruis verlos met ‘n verlossing wat sy Goddelike almag openbaar het.

Hy het in die dood ingegaan met Goddelike beheersdheid en net so het Hy met Goddelike besluitmag daaruit opgestaan.
Deur sy kruisdood het Jesus Christus ons verordineer tot kinders van God.
Dit het gebeur omdat Hy ons ons sondes vergewe het en ons insig verander het sodat ons met huiwering voor sy majesteit en heiligheid kan verskyn.

Hy het ons in die lewe ingestuur met die Heilige Gees by ons.

Die Heilige Gees begenadig ons met wysheid en insig.
Die Here het ons verseël met die Heilige Gees as sy eiendom.
Ons is dus inderdaad volgemaak met al die weldade van ons Hoof, Jesus Christus.
Daarom moet ons Hom nou-al dien soos wat ons dit saam met die engele in die lewe na hierdie een gaan doen.

Geliefde gemeente, die Here se opdrag aan ons is baie duidelik:

Aanbid Hom met eer, en respek!
Kom ons verskyn voor sy troon soos wat die engele en die troongeeste en die ouderlinge voor God se troon dit doen.
Ons buig ons in die diepste eerbied voor die Here Jesus wat uit die dood opgestaan het.

Laat ons altyd onthou waarom die Here hierdie magtige verlossingsdaad uitgevoer het! Kom ek lees dit voor soos wat die Heilige Gees dit laat neerskryf het:
Hy het gesterf sodat Hy die kerk in volle heerlikheid by Hom kan neem, sonder vlek of rimpel of iets dergeliks, heilig en onberispelik (Efesiërs 5:27).
Amen.

Slotgebed.

Slotpsalm 81: 1, 12

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr. M.J. du Plessis
Gereformeerde Kerk Bellville
Datum: 13 April 2003 (oggenddiens)