Dr. M.J. du Plessis Gereformeerde Kerk Bellville Datum: 19 Maart 2006 (aand).

Sing vooraf: Psalm 93:1,

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 47:4

Gebed.

Doksologie:
Aanbidding:
Skuldbelydenis:

Vergifnis:

Dank:
Smeking vir die nood van die gemeente en voorbidding vir die kerk, owerhede en sondige wêreld, asook die beroep op die beloftes van God
Algemene bede:
Verligting van die Gees ter wille van die Woorddiens:

Amen.

Skrifberyming 1-1:5.

Skriflesing: Jeremia 23.
Teks: Jeremia 23:23, 24; Heidelbergse Kategismus Sondag 10

Is Ek ‘n God van naby, spreek die HERE, en nie ‘n God van ver nie? Sou iemand hom in skuilplekke kan wegsteek dat Ek hom nie sien nie? spreek die HERE. Vervul Ek nie die hemel en die aarde nie? spreek die HERE. (Jeremia 23:2324 AFR53)

Die Here het aan Jeremia openbaar dat Hy alomteenwoordig is en dat Hy die hemel en die aarde vervul. Die openbaring van die Here het ’n naam: Die leer van die Voorsienigheid.

Hierdie leer van die Voorsienigheid leer baie duidelik dat daar niks gebeur wat nie deur God se hand gebeur nie.
Daar is nie iewers ’n skuilplek waar ons vir die Here kan wegkruip nie.
Job het eenkeer gesê dat die diere ons kan leer, en dat die voëls van die hemel ons te kenne kan gee wie die Here is.
Hy stuur ons na die aarde self toe en na die see en die visse toe, sodat hulle ons moet vertel dat die hand van die Here al hierdie dinge gemaak het, en dat dit die hand van die Here is wat al hierdie dinge nog steeds onderhou (Job 12 : 7 – 25)

Die Here openbaar die dinge, omdat Hy wil hê dat ons die geweldige troos in die feit van sy skepping en onderhouding van alle dinge moet raaksien.

Hy wil hê ons moet begryp dat daar in sy Raad vir ons voorsiening gemaak word.
In die Voorsienigheid openbaar God Hom aan ons as die Vader van almal wat Hom vrees.
Hoe versterk die feit net nie ons geloof wanneer ons sò daaraan dink nie!

Wat is die Voorsienigheid presies? Die antwoord kry ons in die Bybel - soos ons dit opgesom het in die Nederlandse Geloofsbelydenis (Art 13).

Ons glo dat die goeie God, nadat Hy alle dinge geskep het, dit nie laat vaar of aan die toeval of geluk oorgegee het nie maar dit volgens sy heilige wil so bestuur en regeer dat in hierdie wêreld niks sonder sy beskikking gebeur nie. …

Hierdie leer bied onuitspreeklike troos as ons daardeur geleer word dat niks per toeval oor ons kan kom nie maar alles deur die beskikking van ons goeie hemelse Vader oor ons kom.
Hy waak oor ons met vaderlike sorg en heers so oor alle skepsels dat sonder die wil van ons Vader nie een haar van ons kop - hulle is almal getel - en ook nie een mossie op die aarde sal val nie (Matteus 10:29, 30).

Ons verlaat ons hierop, omdat ons weet dat Hy die duiwels en al ons vyande in toom hou, sodat hulle ons sonder sy toelating en wil geen skade kan aandoen nie. Daarom verwerp ons ook die gruwelike dwaling van die Epikureërs, wat sê dat God Hom met niks bemoei nie en alle dinge aan die toeval oorlaat.

In die eerste plek beteken dit dat God voorsien. Met ander woorde, dat Hy gee waar daar behoefte is.

Hy het vir elke ding ‘n geskiedenis beplan.
Die Uitverkiesing is ook deel van die voorsienigheid van God.

Wanneer Paulus in die brief aan die Romeine skryf dat God nog voor die geboorte van Jakob en Esau na hulle moeder toe gekom het, leer hy ons baie duidelik dat die uitverkiesing ‘n deel van God se raadsplan is
Daar staan geskryf dat die geskiedenis van die twee manne presies gebeur het soos God vooruit gesê het, sodat die voorneme van God volgens sy uitverkiesing vas kan staan (Romeine 9)

Die voorsienigheid is dus die almagtige en alomteenwoordige krag van God, waardeur Hy hemel en aarde onderhou en regeer.

God onderhou vandag nog steeds die hele skepping met presies dieselfde almag as waarmee Hy dit geskape het.
Hy onderhou dit met sy Vaderhand. God beplan alles nou so, dat na die sondeval sy hele Voorsienigheid daarop ingestel is, dat alles op die aarde tot sy eer en tot heil van sy uitverkore kinders moet wees.

Volgens die Bybel moet ons God se almag en sy wysheid sien uit die gebeurtenisse in ons geskiedenis.

Verder bely ons oor die almag van die Here dat God oor blare, gras, reën en droogte, vrugbare en onvrugbare jare, en letterlik alles beplan en beskik. Ons lees dit in Job 12

Kyk, Hy hou die waters terug, en hulle verdroog; ook laat Hy hulle los, en hulle keer die aarde om. (Job 12:15 AFR53)

Ons kan met al ons wetenskap niks teen droogte vermag nie. As God die reën in sy hand toehou, verdroog alles onder ons versorging.
So het ons ook geen verweer teen vloedskade nie. Wanneer God die waters loslaat sodat hulle die aarde omkeer, kan ons God se raad nie keer nie.
Hieruit is dit tog meer as duidelik dat die wêreld nie een oomblik sou bly staan as God dit nie onderhou en versorg het nie.

Die Voorsienigheid van God is juis die waarborg vir die voortbestaan van die aarde, en daarom ook die waarborg van ons voortbestaan – nou en in ewigheid.

Daar is nie so ‘n ding soos toeval nie.

God beskik oor alles.
Daar bestaan nie iets soos toeval nie, want God bestuur alles met sy Raadsplan.

Hy beplan die geskiedenis van mense sò dat sekere dinge met hulle gebeur, om daarmee inkeer of verharding te bewerk.
Elke ding wat gebeur is die uitvoering van God se wette, en nie onbeheersde toeval nie.
In hierdie wetsgehoorsaamheid van die skepping blyk dat die onberekenbare wysheid van God selfs vir die kleinste saak en die nietigste dingetjie voorsiening maak.

Die troos hiervan is dat God so almagtig is dat niks sy raad kan keer of verander nie.
Die Here sal alles vir ons voorsien sodat ons uiteindelik in die ewige koninkryk van God kan gaan woon.

Die Voorsienigheid leer ons dat ons ten volle in Dr. M.J. du Plessis
Gereformeerde Kerk Bellville
Datum: 19 Maart 2006 (aand).

God se besit is.

Selfs die kwaad word tot ons beswil beskik.
God het maar net nodig om sy hand uit te strek en oop te maak, en ons ontvang alles wat nodig is vir ons onderhoud.

Psalm 145:15,16 lui sò:

Die oë van almal wag op U, en U gee hulle hul spys op die regte tyd. U maak u hand oop en versadig alles wat lewe met welbehae. (Psalms 145:15-16 AFR53)

Daar is net een God en sy hand regeer en bestuur alles.

Die Skrif leer die Voorsienigheid van God ook juis so duidelik sodat ons die troos het dat ons ons veilig op die Voorsienigheid van God kan verlaat.

Daar hoef op geen stadium enige twyfel te wees oor die krag van God se bewarende hand nie.
In u grootste teëspoed kan ons ons met vrymoedigheid op die raad van God verlaat. Hy voorsien vir almal – veral vir diè wat glo.

Na die skepping kom die sondeval die wêreld binne.

Daar in die Paradys beloof God aan die vrou, wat alles begin het, dat die Verlosser uit haar gebore gaan word.
God openbaar dat die inhoud van sy Raad (voorsienigheid) is dat Jesus Christus as ‘n mens gaan lewe.
Later openbaar Hy nog meer: Sy Seun gaan heeltemal sonder sonde lewe, sodat die satan op Hom as mens geen houvas het nie.
Die Here openbaar dat Hy beplan het dat sommige mense Hom nie as ‘n ewige God gaan aanvaar nie, maar Hom gaan verwerp.

En so radikaal gaan verwerp dat Hy gekruisig gaan word.

Die Here openbaar dat sy raad bepaal dat daar deur hierdie kruisdood verlossing gaan wees vir diè wat in die Drie-Enige God glo, en sy Raadsplan bely.

Hierdie deel van God se Raadsplan is in ons geskiedenis vervul.

Christus is gebore en kruisig.
Hy het uit die dood opgestaan.
Hy het hemel toe gevaar waar Hy nou voorbereidingswerk doen vir ons koms.

Maar Hy het die Gees na ons toe gestuur om in hierdie moeilike tye wat die laaste tyd van die aarde kenmerk, ons Leidsman te wees.

Die Gees leer en verseker ons dat ons te midde van alle spanning en oorloë en verdrukking nog binne die raamwerk van God se raadsplan is.
Ons word steeds bewaar en deur God se eie hand deur die lewe gelei.

Kom ons lees saam wat die Heidelbergse Kategismus Sondag 10 hieroor bely:

Vraag 27: Wat verstaan jy onder die voorsienigheid van God?
Antwoord: Die almagtige en oralteenwoordige krag van God (a) waardeur Hy hemel en aarde en al die skepsels asof met sy hand nog onderhou en so regeer (b) dat lower en gras, reën en droogte (c), vrugbare en onvrugbare jare, voedsel en drank, gesondheid en siekte (d), rykdom en armoede (e) en alles, ons nie per toeval nie, maar uit sy Vaderhand toekom (f).
(a)Hand 17:2528; Jer 23:23, 24; Jes 29:15, 16; Eseg 8:12. (b) Heb 1:3. (c) Jer 5:24; Hand 14:17. (d) Joh 9:3. (e) Spr 22:2. (f) Matt 10:29; Spr 16:33.

Vraag 28: Wat baat dit ons dat ons weet dat God alles geskep het en dit nog deur sy voorsienigheid onderhou?
Antwoord: Dat ons in alle teëspoed geduldig (a) en in voorspoed dankbaar (b) kan wees. Verder dat ons ook vir die toekoms 'n vaste vertroue in ons getroue God en Vader (c) kan stel dat geen skepsel ons van sy liefde sal skei nie (d), aangesien alle skepsels so in sy hand is dat hulle sonder sy wil nie kan roer of beweeg nie (e).
(a)Rom 5:3; Jak 1:3; Ps 39:10; Job 1:21, 22. (b) 1 Tess 5:18; Deut 8:10. (c) Ps 55:23; Rom 5:4. (d) Rom 8:38, 39. (e) Job 1:12; 2:6; Spr 21:1; Hand 17:2.

Amen.

Slotgebed.
Slotpsalm 99:1, 4, 5.

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr. M.J. du Plessis
Gereformeerde Kerk Bellville
Datum: 19 Maart 2006 (aand).

Tog is God nie die bewerker van die sondes wat gedoen word nie en Hy dra ook nie die skuld daarvoor nie. Sy mag en goedheid is immers so groot en onbegryplik dat Hy sy werk baie goed en regverdig beskik en uitvoer, selfs al handel die duiwels en goddelose mense onregverdig. Ons wil ook nie verder as wat ons kan verstaan, nuuskierig ondersoek instel na dié dinge wat Hy bo die vermoë van die menslike verstand doen nie; inteendeel, ons eerbiedig juis in alle nederigheid en in aanbidding die regverdige oordele van God wat vir ons verborge is. Ons is tevrede daarmee dat ons leerlinge van Christus is om slegs te leer ken wat Hy aan ons in sy Woord openbaar, sonder om die grense daarvan te oorskry. (Nederlandse Geloofsbelydenis; res van art 13)