Dr. M.J. du Plessis Gereformeerde Kerk Bellville Datum: 12 September 2004 (aand)

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Skrifberyming 1-1:1
Gebed.
Psalm 89:11

Skriflesing: Johannes 14
Teks: Kategismus Sondag 8; Johannes 14:

Glo in God, glo ook in My

Filippus sê vir Hom: Here, toon ons die Vader, en dit is vir ons genoeg.

Jesus sê vir hom: Ek is so lankal by julle, en het jy My nie geken nie, Filippus ? Hy wat My gesien het, het die Vader gesien. En hoe sê jy: Toon ons die Vader ?

En Ek sal die Vader bid, en Hy sal julle 'n ander Trooster gee om by julle te bly tot in ewigheid; die Gees van die waarheid ...

'n Mens se lewe is 'n presiese weergawe van dit wat jy glo. As ons dit met 'n beeld mag vergelyk: dit is soos 'n skaduwee: dit vertoon die beeld van die ding wat die skaduwee veroorsaak.

As jou kennis van God, en liefde vir die Here maar aan die dun kant is, gaan die uitlewing van jou geloof net so yl wees.
Maar as jy die Here waarlik ken en liefhet, gaan jou geloof en alles wat uit jou geloof voortkom, baie diepsinnig we

Kom ons gee aandag aan die volgende sake:

1. Skrifuitsprake oor die Drie‑Eenheid van die Here

2. Die satan se vervalsing van die Drie-Eenheid

3. Ons bely die Drie-Eenheid in die nagmaalviering

1. Skrifuitsprake oor die Drie‑Eenheid van die Here

Hierdie preek handel oor die Drie‑Eenheid van God en wat daarvan word in ons lewens. Kom ons maak ons vertrekpunt dit wat die Bybel ons leer van die Drie‑Eenheid. U moet dan daarop let dat daar nie een teks is wat sê dat God 'n Drie‑Eenheid is nie.

Daar is wel plekke, soos die een wat ons gelees het, waar Jesus Homself aan die Vader verbind as een en dieselfde Wese, soos Hy vir Filippus gesê het: Wie My gesien het, het die Vader gesien.
Net so koppel Hy ook die Heilige Gees aan die Vader, en net verder aan in Johannes 15: 26 koppel Jesus die Heilige Gees aan Homself.

As ons al hierdie verskillende Skrifuitsprake aan mekaar koppel, word dit vir ons baie duidelik dat daar 'n Drie‑Enige God is.

Dit maak een saak baie duidelik: Die Here is so magtig en so onpeilbaar in sy bestaan, dat 'n mens nie kan deurdring tot alles wat die Here raak nie.

Die feit is dat mens met alles moet konsentreer op wat die Here in die Bybel van Homself openbaar, en daaruit kom ons dan agter dat daar een God is, maar dat Hy in drie Persone bestaan.
Ons kom agter dat die Here God is wat in sy heerlikheid onstuitbaar is deur alle magte in die hemel en op die aarde.
Ons kom agter dat sy heerlikheid so groot is dat dit enige skepsel wat dit aanskou, vernietig.

Die Here se grootheid is so oneindig dat geen mens hom daarin kan indink nie, al probeer hy ook hoe hard. Daarom is dit 'n onbegryplike misterie dat God dit kan regkry om God die Vader in die hemel te wees, en terselfdertyd Jesus Christus, en dan nog die alomteenwoordige Heilige Gees ook, wat mense in hulle harte verlig.

Paulus het hierdie beperktheid van ons vermoëns in gedagte gehad toe hy in 1 Korintiërs 13:12 geskryf het dat ons in hierdie lewe soos deur 'n spieël in 'n raaisel kyk, en dat ons eers in die hiernamaals dinge reg sal verstaan.

2. Die satan se vervalsing van die Drie-Eenheid

In ons kennis en vermoë om te begryp word ons deur die duiwel beïnvloed.

Hy het 'n groter houvas op die manier waarop ons dinge insien en verstaan as wat ons soms dink. Hy weet goed dat ons die Here nie so goed sal dien, as hy ons dinge verkeerd laat verstaan nie, en hy weet ook dat ons maklik sonde sal doen as hy ons net sover kan kry om sekere dinge van die Here te bevraagteken.
Die duiwel loop ook dikwels die openbaring van die Here vooruit, en dan hou hy 'n skewe ding voor ons, sodat ons gesindheid verkeerd is wanneer die Here met die ware openbaring kom.

Ek noem graag vir u die volgende voorbeeld. Lank voor die Here Jesus se geboorte was daar al 'n beeld in Rome waarop die volgende woorde gegraveer was: "Die grote God wat deur God voortgebring is, is die algeheel skynende." Die duiwel het dus al in hierdie beeld die geboorte en menswording van die Here Jesus probeer vervals in 'n afgodsbeeld.
Ons het in die heidendom nog 'n voorbeeld van so 'n godsdiensuitspraak wat dui op 'n vervalsing van die Drie‑Eenheid van God. In die Serapeumkultus (diereaanbidding wat voorgekom het tydens die vyfde plaag) van die ou Egiptenare was daar 'n orakelspreuk wat so gelui het: "Alles is een God, daarna die Woord en die Gees; drie Gode tesame voortgebring wat hulle met mekaar verenig het."

Dis natuurlik nie waar dat God voortgebring is, of dat God drie Gode is wat met mekaar saamgesmelt het nie. Maar die gedagte van die Drie‑Eenheid is tog waar. Ons het hier baie duidelik te doen met 'n vervalsing van God se openbaring.

Ons moet hierdie dinge verstaan teen die agtergrond van Romeine 1: 19 ‑ 21:

... omdat dit wat van God geken kan word, in hulle geopenbaar is, want God het dit aan hulle geopenbaar. Want sy onsigbare dinge kan van die begin van die skepping van die wêreld af in sy werke verstaan en duidelik gesien word, naamlik sy ewige krag en goddelikheid, sodat hulle geen verontskuldiging het nie; omdat hulle alhoewel hulle God geken het, Hom nie as God verheerlik of gedank het nie; maar hulle het dwaas geword in hulle oorlegginge, en hulle onverstandige hart is verduister.

3. Ons bely die Drie-Eenheid in die nagmaalviering

Dit klink ondenkbaar dat die Here heidene sommer net so in die hel kan gooi omdat hulle Hom nie aanbid het nie.

Ons dink soms dat hulle 'n saak het. Maar as ons na die heidene se godsdienste gaan kyk, dan kry ons dinge soos die wat ek vir u genoem het daarin.
Dan besef ons dat God Hom tog aan hulle geopenbaar het, maar dat hulle die ware openbaring verdraai het.

Hierdie ding behoort by ons 'n rooi lig aan te skakel: Dit is die pad wat die heidene geloop het met God se openbaring oor Homself en oor die Drie‑Eenheid. Watter pad loop ons, want ons het die ware en volle openbaring?

Bestudeer ons die Bybel as openbaring van God?
Ken ons die Here soos Hy Hom openbaar, en aanbid ons Hom soos wat dit van ons verwag word? 'n Roekelose lewe en 'n skewe geloof bewys net dat jy die Vader in sy bevel en die Seun in sy versoening en die Heilige Gees in sy leiding nie ken nie.

Hier pas die Bybel. Ons het onlangs aan die Nagmaaltafel gesit.

Dit was ook 'n belydenis dat ons die almagtige God waarlik ken in sy oordeel oor ons sondes
Dit was ook 'n belydenis dat ons die almagtige God waarlik ken in sy genade dat Hy vir ons voldoening van ons sondes bewerk het.
Dit was ook 'n belydenis dat ons onder die leiding van die Heilige Gees aan die tafel sit om sy bevel te gehoorsaam.
Ons het dus bely dat ons God ken soos Hy Hom in sy Woord aan ons openbaar.

Kyk net weer hoe ons die Drie-Eenheid in die Nagmaalviering bely:

Ons bely dat ons besef dat ons slegs die oordeel van die Here kan oorleef as die Vader Jesus Christus straf vir ons sondes.
Ons bely dat ook net die Here Jesus Christus uit die dood kon opstaan en aan ons die ewige lewe gee. Net Hy kan ook al ons wandade versoen met die algeheel heilige God.
Ons bely dat die Here elke dag saam met ons is. Hy regeer ons harte en verstande sodat ons die geloofsake kan verstaan en ons eie maak. En die Heilige Gees leer ons om te onderskei ‑ en om gehoorsaam te wees.

Die belydenis van die Drie‑Enige God werk dus na twee kante toe.

Na die een kant toe bely jy dat jy die Drie‑Enige God in sy Wese ken ‑ en in die ewigheid staan jy midde in die vreugde van die teenwoordigheid van hierdie God wat jou oorspoel.
Of jy bely God nie soos Hy Hom openbaar nie, en jy gaan vir ewig verlore.

Dit is die twee uiterstes. Dan kom daar nog dinge tussen‑in: Jy kan God nie bely, maar jou geloofslewe skiet tekort nie. Dis 'n skynheilige belydenis wat die verdoemenis tot gevolg het.

Daar kom tye of geleenthede wanneer elke mens sonde doen.
Maar dan moet jy onder die leiding van die Heilige Gees opstaan, en deur die genade van die Here Jesus gedra, weer die goeie soek en doen.

Dis belangrik om te mag weet dat die Drie‑Enige God die afstand tussen Hom en die wat werklik glo, wegneem.

Daarom daal Hy neer na hulle toe.
Hy kom sterf vir mense wat swak is, maar wat tog in ware opregtheid stry om God beter te dien en te verheerlik.
Al drie die Persone van God bewerk vir die sondaar weer ware lewensgemeenskap met die Here.

Opsommend kan ons sê dat ons een God ken wat Hom in verskillende Persone aan ons openbaar:

God die Vader in sy liefde.
God die Seun in sy Verlossing.
God die Heilige Gees wat ons met krag troos en lei.

Kom ons lees Kat. Sond. 8 saam

Vraag 24: Hoe word hierdie artikels ingedeel?
Antwoord: In drie dele: die eerste handel oor God die Vader en ons skepping; die tweede oor God die Seun en ons verlossing; die derde oor God die Heilige Gees en ons heiligmaking.

Vraag 25: Terwyl daar maar tog net een, enige Goddelike Wese is, waarom praat jy van drie, naamlik die Vader, Seun en Heilige Gees (a)?
Antwoord: Omdat God Hom so in sy Woord geopenbaar het (b) dat hierdie drie onderskeie Persone die enige, ware en ewige God is.
(a)Deut 6:4; Ef 4:6; Jes 44:6; 45:5; 1 Kor 8:4, 6. (b) Jes 61:1; Luk 4:18; Gen 1:2, 3; Ps 33:6; Jes 48:16; Matt 3:16, 17; 28:19; 1 Joh 5:7; Jes 6:1, 3; Joh 14:26; 15:26; 2 Kor 13:13; Gal 4:6; Ef 2:l8; Tit 3:5, 6.

Amen.

Slotgebed.

Skrifberyming 12-2:1

Die genade van die Here Jesus Christus en die liefde van God en die gemeenskap van die Heilige Gees bly by u almal.

Amen.

Dr. M.J. du Plessis
Gereformeerde Kerk Bellville
Datum: 12 September 2004 (aand)