Dr MJ du Plessis Gereformeerde Kerk Bellville Datum: 10 September 2006 (oggend)

Sing vooraf: Psalm 2:6

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 33:1, 3
Geloofsbelydenis: Nicea

Na die wet bely ons voor God ons sondeskuld en bid vir ’n nuwe lewe met Ps. 19:4.
Wet
Psalm 19:4

Gebed

Doksologie:
Aanbidding:
Skuldbelydenis:
Vergifnis:
Dank:
Smeking vir die nood van die gemeente en voorbidding vir die kerk, owerhede en sondige wêreld, asook die beroep op die beloftes van God:
Algemene bede:
Verligting van die Gees ter wille van die Woorddiens:

Amen.

Psalm 32:1

Skriflesing: Lukas 3 en Matteus 3
Teks: Lukas 3:16; Matteus 3:11

. . . antwoord Johannes almal en sê:Ek doop julle wel met water, maar Hy kom wat sterker is as ek, wie se skoenriem ek nie waardig is om los te maak nie – Hy sal julle doop met die Heilige Gees en met vuur. (Lukas 3:16 AFR53)

Ek doop julle wel met water tot bekering; maar Hy wat ná my kom, is sterker as ek, wie se skoene ek nie waardig is om aan te dra nie. Hy sal julle doop met die Heilige Gees en met vuur. (Matteus 3:11 AFR53)

Elkeen van ons is toe ons gedoop is, gedoop met die Heilige Gees.

In hierdie proses was daar geen bepalende aksie van die gelowige se kant wat veroorsaak het dat die Heilige Gees aan hom toegeken is nie.
Dit is ’n daad wat totaal van die Here af uitgegaan het en waarin Hy sy verbond aan die gedoopte toegeken het.
In hierdie toekenning het Hy ook sy Heilige Gees gegee as ’n wesenlike deel van sy verbond.

In hierdie preek word aandag gegee aan die volgende sake:

1. Die betekenis daarvan om met die Heilige Gees gedoop te wees
2. Die Heilige Gees volg my van my doop af in my lewe

1. Die betekenis daarvan om met die Heilige Gees gedoop te wees

Die Heilige Gees en vuur is twee elemente wat ons in die Bybel baie keer saam kry. Die rede is voor die hand liggend: die een verteenwoordig die ander in ’n sekere sin.

Die Here gebruik baie keer vuur om sy teenwoordigheid te openbaar.
Soms dui dit sy genade aan en ander kere sy oordeel.

Ons lees in Levitikus 9:24 van die eerste offers wat Aäron as hoëpriester gebring het.

Hy het sy hande na die volk toe uitgesteek en hulle geseën.
Toe het hy en Moses saam in die tent van samekoms ingegaan en toe hulle uitgekom het, het hulle die volk geseën.
Die Here het toe sy heiligheid aan die hele volk geopenbaar deurdat vuur uit die Here se aangesig uitgegaan het en die brandoffer en die stukke vet op die altaar verteer het.

Die hele volk het verstaan dat dit die openbaring is dat die Here in hulle midde is en dat Hy hulle offer aanvaar. Hulle het neergeval en gejuig.

Maar dit het nie altyd goed gegaan wanneer die Here Hom in vuur aan die volk geopenbaar het nie.

Ons lees in Levitikus 10:2 dat Aäron se twee seuns, Nadab en Abihu, met vreemde vuur voor die Here opgedaag het, en dat daar vuur van die Here af uitgegaan het en die twee manne verteer het.
Die Here het dus vuur gebruik om sy oordeel en sy genade te openbaar.

Johannes die Doper se preke en sy doop het na hierdie dinge verwys.

Hy het gepreek dat die koninkryk van die hemele naby gekom het.
En toe preek hy die Here Jesus Christus:
- Ek doop julle met water tot bekering, maar Hy wat na my kom . . . Hy sal julle doop met die Heilige Gees en met vuur.
- Die doop van Johannes was ’n heenwysing na die doop van Jesus.

Volgens die getuienis van Markus (1:8) en Johannes (1:33) sal die Here Jesus met die Heilige Gees doop. Matteus (3:11) en Lukas (3:16) praat weer van ’n doop met vuur.

Die twee moet met mekaar verbind word, want die kombinasie van Gees/wind en vuur kom al in die Ou Testament voor (vergelyk Jesaja 29:6; 30:27vv).

Vanweë die Here van die leërskare sal jy in genade besoek word, met donder en aardbewing en groot gedruis, wind en storm en die vlam van ’n verterende vuur. (Jesaja 29:6 AFR53)

Die bediening van die Heilige Gees en die bediening van die vuur aan die dopeling is presies dieselfde bediening, daarom laat twee van die evangeliste die woord vuur weg.

As dit dan dieselfde is, waarom word die woord vuur dan deur twee saam met die Heilige Gees genoem?

Die vuur sien op die reinigende werking van die Gees van God:
- Die Gees brand die sonde weg en reinig die hart.
Doop met die Heilige Gees en doop met vuur is dus dieselfde gebeurtenis, maar met tweërlei werking.

Die Messias kom om twee dinge te doen:

Hy kom met Geesteswerking.
En Hy kom met oordeelsvoltrekking.
- Hy is die Redder en Regter,
- maar Hy is ook Gerigsdraer en Gerigsvoltrekker.

Die doop met vuur wys na die laaste oordeel toe.

Toegepas beteken dit dat elke mens wat gedoop word, fisies die Heilige Gees ontvang sodat Dié hom kan voorberei op die laaste oordeel.

Die Heilige Gees wat by die doop aan die mens bedien word, werk bekering in die dopeling se lewe. Dit is waarom Johannes ook bly preek het dat die mense tot bekering moet kom.

Bekering is om rein te word.
Jesus se doop met vuur is ook die simbool van reiniging, want in die Ou Testament is daar hoeveel voorbeelde van die vuur van God se teenwoordigheid wat onrein mense weggebrand het.
Net so brand die Heilige Gees die mens wat in Jesus se Naam gedoop is skoon met bekering.
Alle bekering word deur die Heilige Gees gewerk.

Jesus se doop word ’n doop met die Heilige Gees en met vuur genoem. Die doop met die Heilige Gees wys na Pinkster toe. Ons lees in Handelinge 1:4, 5 die volgende:

En toe Hy nog met hulle saam was, het Hy hulle bevel gegee om nie van Jerusalem weg te gaan nie, maar om te wag op die belofte van die Vader, wat julle, het Hy gesê, van My gehoor het. Want Johannes het wel met water gedoop, maar julle sal met die Heilige Gees gedoop word nie lank ná hierdie dae nie. (Handelinge 1:4-5 AFR53)

Let op hierdie woorde: . . . julle sal met die Heilige Gees gedoop word nie lank ná hierdie dae nie.

Met die uitstorting van die Heilige Gees het die doop van die apostels volledig geword.
Dit beteken glad nie dat die Heilige Gees net (eers) uitgestort kan word wanneer iemand gedoop word nie.
Die Heilige Gees werk selfs voordat iemand gedoop is reeds in Hom.
- ’n Duidelike voorbeeld is volwassenes wat tot bekering kom en belydenis van hulle geloof aflê en dan eers gedoop word.
- Alles wat gebeur het voordat hulle gedoop word, is reeds deur die Heilige Gees bewerk.

Waterdoop en Geestesdoop beklemtoon al twee dieselfde saak:

Die een beklemtoon dit positief en die ander een beklemtoon dit negatief.
Die waterdoop beklemtoon die negatiewe: Die sondes word afgewas.
Die Geestesdoop beklemtoon die positiewe: Dit wys op die oorvloedige skenking van die nuwe lewe.

2. Die Heilige Gees volg my van my doop af in my lewe

Let daarop dat Johannes die Doper sy aankondiging dat Jesus Christus die Doper met die Heilige Gees is, geplaas het in die raamwerk van sy verkondiging van die koninkryk van God (Matteus 3:2vv).

Die doop met die Heilige Gees is dus niks minder nie as die aankoms van die koninkryk van God in die dopeling se lewe.
Die doop is dus van God se kant af ’n bevestiging dat ek deur sy genade oorgaan van ’n lewe van sonde en verlorenheid af na die lewe van ewige heerlikheid by God.

Let daarop dat Jesus self ook gedoop is met die Heilige Gees, sodat daarin die verhouding tussen die koninkryk van God en die doop met die Heilige Gees duidelik geopenbaar kan word.

Om hierdie gebeurtenis goed te kan verstaan, moet ons die woorde van Johannes 1:33 baie goed verstaan. Daar word vermeld dat die Heilige Gees nie net op Jesus neergedaal het nie, maar ook op Hom gebly het.

En ek het Hom nie geken nie; maar Hy wat my gestuur het om met water te doop, Hy het aan my gesê: Op wie jy die Gees sien neerdaal en op Hom bly, dit is Hy wat met die Heilige Gees doop. (Johannes 1:33 AFR53)

Dit is presies ook wat die betekenis van Pinkster is.

Met die uitstorting van die Heilige Gees het die koninkryk van God gekom.
Van die doop met die Heilige Gees af is die koninkryk van God by al die koninkryke op die aarde teenwoordig.

Ons lees in Handelinge 19 dat Paulus in Efese gekom het en daar dissipels van Johannes die Doper raakgeloop het.

Hy het toe vir hulle gevra of hulle al die Heilige Gees ontvang het.
Hulle antwoord was dat hulle nie eers geweet het dat daar ’n Heilige Gees is nie.
Hulle is toe gedoop in die Naam van Jesus Christus, en daarna het hulle die Heilige Gees ontvang.

Uit al hierdie geleenthede is dit duidelik dat die Heilige Gees elke keer wanneer iemand in die naam van Jesus Christus gedoop word, op die persoon gekom het.

Ons lees nie in die Bybel dat dit verder in die geskiedenis weer so duidelik was soos by die eerste paar geleenthede nie.
Dit is ook nie nodig nie, want die eerste geleenthede het dit juis duidelik gemaak dat dit in die toekoms altyd so sal wees, al word alles nie gesien wat gebeur nie.

Die gedeelte in die Evangelie volgens Johannes 1:29-34 is belangrik.

Daar toon Johannes aan dat die Lam van God die Seun van God is en dat daar ’n band is tussen die wegneem van sonde en die doop met die Heilige Gees.
Ons kan inderdaad die doop met die Heilige Gees aandui as die gee van ’n nuwe lewe deur die vergewing van sondes.

Baie prakties gestel beteken dit dat iemand wie se sondes vergewe is, in die Heilige Gees sal lewe.

Hy kom dan los van sy ou lewe.
- Die ou lewe van elke mens is wanneer hy in sondes volhard.
- Dink maar aan dinge soos moedswilligheid, roekeloosheid en bakleierigheid. Soms is ons agteraf. Dit gebeur dat ons steel en graag goed wil hê wat nie ons s’n is nie. So sou ons kon aangaan.
Teenoor hierdie dinge is daar die nuwe lewe wat God die Heilige Gees in ons bewerk:
- Ons bid meer, ons leef in vrede met ander mense, ons probeer om goed te doen en om mense wat hulp nodig het by te staan, ons bevorder ander mense se eer eerder as om hulle te beskinder.
- En ons probeer om elkeen in sy eie lewe al heiliger te word – ons probeer om met elke sonde wat ons doen, te breek.

Ons het pas Nagmaal gevier. Nou moet ons onsself vra:

Waar pas die Geestesdoop in in my lewe nadat die Here my aan die heilige Nagmaaltafel van my verlossing en van vergifnis van al my sondes verseker het?
Die antwoord is eenvoudig: Die Heilige Gees lê beslag op ons hele lewe.
Maar die uitvoering van ’n Geesvervulde lewe is nie so eenvoudig nie. Ons doen baie keer sonde omdat ons aanlewe sonder om te besef dat ons in diens van God se eer staan.

Kom ons kyk na voorbeelde:

Baie van ons veg ons getroude lewens om. Ons weet meer van rusiemaak as van saambid en beeld van God wees.
Ander bring kinders in die wêreld, maar maak hulle nie tot eer van God groot nie. Ons los hulle so soort van in hulle eie hande.
Ons werk elke dag soos wêreldmense – ons brou en werk onnet.
Ons lê soms rond op plekke waar Christene nooit gesien behoort te word nie.

In kort: Die styl van God die Heilige Gees is vir groot gedeeltes van ons lewens nie sigbaar nie omdat ons die teenwoordigheid van die Heilige Gees in ons ignoreer.

Wat moet ons maak van die inwoning van die Heilige Gees?

Ons moet met ons hart en met ons verstand God loof en prys, want die Heilige Gees werk met al twee.
Ek moet my hele lewe berekend beplan sodat dit in elke opsig die eer van God verkondig.

Natuurlik moet ons nou nie daarmee oorboord gaan en weer na die ander kant toe sonde doen met dinge soos geesdrywery en emosionele opwellings nie.

Daar is mense wat hulle laat herdoop na sogenaamde bekerings of herbekerings.
Voordat so iets kan gebeur, moet jy baie duidelik antwoord op hierdie vraag: Wat word van die eerste toekenning van die Heilige Gees?
- Kan ’n mens die toekenning van die Heilige Gees verwerp?
- Kan ’n hertoekenning van die Heilige Gees hoegenaamd plaasvind?
- Kan die doop met die Heilige Gees beheer of aan menslike voorwaardes onderwerp word? – want dit is wat gebeur met oordoop.

Die probleem is dat sonde teen die Heilige Gees nooit vergewe word nie.

Mens moet dus oppas om nie eers naby die terrein te kom waar jy teen die Heilige Gees oortree nie.
Luister na wat in Matteus 12:31-32 geskryf staan:

Daarom sê Ek vir julle: Elke sonde en lastering sal die mense vergewe word, maar die lastering teen die Gees sal die mense nie vergewe word nie. En elkeen wat ’n woord spreek teen die Seun van die mens, dit sal hom vergewe word; maar elkeen wat spreek teen die Heilige Gees, dit sal hom nie vergewe word nie, in hierdie eeu nie en ook in die toekomende nie. (Matteus 12:31-32 AFR53)

Enige mens kan baie maklik in ’n situasie beland waar hy teen die Heilige Gees sondig.

Dink aan Ananias en Saffira wat oor hulle kerklike bydrae gelieg het, en al twee dood neergeval het omdat hulle vir die Heilige Gees gelieg het – so sê die Bybel (Handelinge 5).

Die regte riglyn vir ’n suiwer lewe lê reeds in Johannes die Doper se preek. Die koninkryk van God het gekom. Die Here Jesus is hier.

Hy ken kragtens sy almag sy (nuwe) verbond aan elkeen van ons toe.
Hy maak dus die woorde wat God gesê het toe Hy die verbond met Abraham opgerig het waar: Ek sal my verbond oprig tussen My en jou.
God rig sy verbond met ons op. Vandag nog. Die oomblik wanneer ons in die Naam van die Here Jesus gedoop word, doop Hy ons ook met die Heilige Gees.

Onder die leiding van die Heilige Gees groei ons op en kom ons elke dag tot bekering van ons sondes. So word ons heiliger totdat ons eendag in die hiernamaals is.
Amen.

Slotgebed
Slotpsalm 66:7

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr MJ du Plessis
Gereformeerde Kerk Bellville
Datum: 10 September 2006 (oggend)