Dr. M.J. du Plessis Gereformeerde Kerk Bellville Datum: 24 Julie 2005 (oggend)

Sing vooraf: Psalm 49:2, 6.

Ons begin hierdie ontmoeting met God deur openlik teenoor mekaar en teenoor God te verklaar:
Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Skrifberyming 5-4:1-6(10)
Geloofsbelydenis: Nicea

Na die wet sing ons voor God van nuwe lewe met Ps. 20:1,
Wet
Psalm 20:1, 5

Gebed.

Doksologie:
Aanbidding:
Skuldbelydenis:

Vergifnis:

Dank:
Smeking vir die nood van die gemeente en voorbidding vir die kerk, owerhede en sondige wêreld, asook die beroep op die beloftes van God
Algemene bede:
Verligting van die Gees ter wille van die Woorddiens:

Amen.

Psalm 32:1, 4.

Skriflesing: Openbaring 12.
Teks: Openbaring 12: 7

En daar het oorlog in die hemel gekom: Mígael en sy engele het oorlog gevoer teen die draak, en die draak en sy engele het oorlog gevoer; (Openbaring 12:7 AFR53)

Inhoud: ‘n Sagte aanval met harde gevolge!

Twee tekens verskyn in die hemel:

Die een word genoem ‘n groot teken: Die groot teken is ‘n pragtige jong swanger vrou wat besig was om ‘n seun in die wêreld te bring.

Let op na die heerlikheid waarmee die vrou - die kerk van die Here - beskryf word:

En ‘n groot teken het in die hemel verskyn: ‘n vrou wat met die son bekleed was, en die maan was onder haar voete, en op haar hoof ‘n kroon van twaalf sterre; (Openbaring 12:1 AFR53)

Haar klere is die son - die volle heerlikheid van God.
Die maan en die sterre onder haar voete, want sy styg bo die skepping uit.
Sy dra ‘n kroon van twaal sterre: Sy is die kerk – die volle getal van al die uitverkorenes van God .

Natuurlik verskyn hierdie teken van die vrou (die kerk) in die hemel, want dis waar God voor die skepping al die bestaan en die verloop en die uiteinde van sy kerk beplan het.

Die kerk eindig na die wederkoms van die Verlosser in die koninkryk van God in die volle heerlikheid van God.
Die feit dat die teken in die hemel verskyn, is dus om daarmee aan te toon dat die hemel die plek is waarvandaan God met sy ewige Raadsplan heers en bestuur.

Die groot teken van hierdie vrou verskyn in die hemel, maar sy is deur God bedoel en beskik om oor die aarde te heers.

Die kerk se geskiedenis word uit die hemel uit beplan en beskik, maar dit speel op die aarde af.
Dit is hier waar die draak wat voorgee dat hy goddelik is, die kerk probeer verlei, aanval en vernietig!

Die tweede teken wat in die hemel verskyn, is ‘n vuurrooi draak.

Die openbaring van die Here sê nie dat hierdie teken groot is nie - inderdaad is dit magtig, maar nie Goddelik magtig nie.
Die Here openbaar wel dat hierdie draak ‘n nabootser is wat iets van homself wil voorgee wat nie waar is nie: Hy het sewe koppe en tien horings en sewe krone op sy sewe koppe. Hy wil voorgee dat hy magtiger - selfs sewe keer magtiger is as God self!

Die groot vuurrooi draak verskyn ook in die hemel.

Dis waar hy graag wil wees.

Dis die plek wat hy as sy eiendom wil hê om daar te bly en te heers en te maak wat hy wil.

Daarom verskyn hy met sewe koppe en tien horings en sewe krone op sy sewe koppe.

Hy wil die indruk skep van hoe magtig hy is en hoe goed hy regeer - maar hy is ‘n draak.

Dit wat hy voorgee, verander nie sy wese nie – hy bly tot in sy diepste wese sleg.

Daarom val hy die kerk aan - die mooi vrou en haar Kind.

Openbaring 12 beskryf die val van die duiwel en hoe hy tevergeefs probeer het om Jesus te vernietig, maar toe deur die engele verpletterend verslaan is.
Daar was 'n geweldige oorlog in die hemel.
Dit het plaasgevind onmiddelik na die hemelvaart.

Toe Jesus opgevaar het, het die Satan besluit dat hy met die volle mag van die hel die Here Jesus gaan aanval en Hom vernietig, sodat Hy nie in die hemel sy plek kan inneem nie.
Dit was 'n wanhoopspoging van die duiwel, want hy het goed verstaan dat hy verslaan is.

Op daardie stadium het Jesus die Satan al klaar beslissend verslaan.

Daarom het die engele die duiwel met soveel gemak uit die hemel uitgewerp dat hy en elkeen van sy engele tot vandag toe nooit weer daar kon kom nie. Die Bybel sê: "Hulle plek was in die hemel nie meer te vinde nie!"
Die engel Migael was meer as een keer in 'n geveg met die duiwel betrokke. Ons lees byvoorbeeld in Judas vers 9 dat hulle twee in 'n kwaai rusie betrokke was oor die bene van Moses.
Ons lees ook dat Migael die groot vors is wat deur die Here aangestel is om te sorg vir die Israeliete in Babel (Dan. 12: 1). Migael is dus 'n engel wat groot mag en aansien het. Daarom is dit glad nie verbasend dat dit juis hy is wat die Satan en sy engele te lyf gaan en keer dat hulle nie die hemel inval nie.

Die Satan het vroeër dikwels in die hemel gekom. Hy was egter nooit eerlik nie.

In sy agterbaksheid wou hy God self wees, en in sy aanslag om dit te wees, het hy ontsettende skade in die hemel onder die engele aangerig.
Daarna het hy gewoonlik daar gekom en gemaak asof hy die Here se saak wil dien. (Job 1 en 2).
Hy het gewoonlik baie skynheilig gekla oor gelowiges; so asof hy die geregtigheid en heiligheid van die Here op sy hart het.

Maar die dag toe Migael hom aangeval het, het hierdie saak heeltemal in die reine gekom.

Die duiwel is op so 'n ondubbelsinnige manier aan die kaak gestel dat hy op geen manier ooit weer toegang tot die hemel sal kry nie.
Trouens hy is letterlik daar uitgesmyt.
Die resultaat van hierdie oorwinning word dadelik aangekondig.

In die hemel gaan daar 'n groot gejuig op. Johannes hoor die jubelsang van die hemelkore.
Die rede word ook gegee: die duiwel wat altyd die gelowiges by God gaan verkla het, is neergewerp.
Die saak word baie sterk gestel: Hy is nie verslaan nie. Hy is neergewerp. Hy is plat op die aarde neergegooi.

Vers 11 sê baie duidelik watter wapens die engele gebruik het. Hulle het geveg teen die duiwel gewen:

Deur die bloed van die Lam
En deur die woord van hulle getuienis
En omdat hulle hulle eie lewe tot die dood toe nie liefgehad het nie.

Geliefdes, besef u dat dit wapens is wat ons ook besit? Deur die kruisdood, die opstanding en die hemelvaart van Jesus Christus en die daaropvolgende inwoning (en inwerking) van die Heilige Gees, besit ons al hierdie dinge!

Waarom is dit nodig dat ons daaraan moet dink en dit moet weet? Die Here openbaar dit in die gedeelte:

Daar het oorlog in die hemel gekom. Daar in die hemel is die duiwel verslaan.
Die gevolg van hierdie oorwinning is dat hy op die aarde neergewerp is. Dit is die gebied waar die kerk beskik is om te heers! Ons blyplek.
Hier op die aarde het die Here Jesus hom ook al verslaan - maar die kerk het nog sy deel om te doen tot die wederkoms!

Hoe lyk die draak vir ons? Waarvoor moet ons versigtig wees? Wat weet ons van hom, want jy moet tog jou vyand ken as jy teen hom wil en moet veg?

Ons kyk van twee kante af:
Eerste van God se kant af:

En ‘n ander teken het in die hemel verskyn, en daar was ‘n groot vuurrooi draak met sewe koppe en tien horings, en op sy koppe sewe krone; en sy stert het die derde van die sterre van die hemel meegesleep en hulle op die aarde gegooi. En die draak het gestaan voor die vrou wat op die punt was om te baar, sodat hy haar kind sou verslind sodra sy gebaar het. (Openbaring 12:3-4 AFR53)

God openbaar die duiwel as ‘n draak: moorddadig.

Sy vuurrooi kleur is ook die kleur van bloed en haat.
Dis sy wese - hy is ‘n vernietiger, ‘n skepsel wat tweespalt en dood veroorsaak. Hy is venynig

God openbaar die duiwel as iemand wat voorgee wie hy nie is nie, tien keer magtiger en sewe keer goddeliker as God self.

Nou kyk ons in die tweede plek weer na die duiwel, maar van ons gesigspunt af. Wat sien ons?

Ons sien ‘n wese wat groot en groots is.
Ons sien ‘n wese met (sover ons kan sien!) – volmaakte wysheid (Dis die tien koppe).
Ons sien ‘n mag wat weet hoe om te regeer en mense en skares te beheer. ‘n Wese wat wette het wat goed uitwerk en wat werklik sy mag vestig (dis die sewe krone en die tien horings).

Dit is waarom ons so moet smeek dat ons die gawe van onderskeiding moet hê onder die leiding van God die Heilige Gees.

Alles wat vir ons en die wêreld reg is en reg lyk, is nie noodwendig vir die koninkryk van God reg nie.
Hier is ‘n baie mooi voorbeeld van alles wat die wêreld van ons tyd met oop arms gaan verwelkom, want dit is wat almal soek.: Iemand met gesag wat insig het wat werk: ‘n wêreldleier van formaat.
Die Here openbaar dat dit inderdaad hierdie magtige skerp leier is wat die enigste grootste vyand van Hom en sy koninkryk is wat aan die werk is!

Daar is ander plekke in die Bybel waar dit geopenbaar word dat die antichris ook onder andere met politiek en sosiale strukture werk.

Maar hier openbaar die Here dat hierdie draak met die kerk werk.
Dit is nou die ding wat aandag vra: Hoe werk die draak met die kerk? Werk hy met openlike geweld? Hoe doen hy sy ding?

Openbaring 12 is daaroor duidelik: Die draak probeer die Here Jesus Christus jag: hy staan voor die vrou om haar kind te verslind.

Dit sou ons sê, is mos maklik herkenbaar. Ons kan die duiwel daarop teenstaan en beveg.

Maar dit gebeur anders.

En die slang het uit sy bek water soos ‘n rivier agter die vrou aan uitgegooi, om haar te laat wegvoer deur die rivier. En die aarde het die vrou te hulp gekom, en die aarde het sy mond oopgemaak en die rivier opgesluk, wat die draak uit sy bek uitgegooi het. En die draak was vertoornd op die vrou, en hy het weggegaan om oorlog te voer teen haar ander nakomelinge wat die gebooie van God bewaar en die getuienis van Jesus Christus hou. (Openbaring 12:15-17 AFR53)

Kyk wat vertel die beeld: die woestyn is ‘n droë plek. Daar is hitte en droogte en nie water nie. Meeste plante en mense gaan in woestyne dood van die dors.

Daarom spoeg die duiwel ‘n stroom water soos ‘n rivier water uit. Natuurlik moet die water die vrou vernietig, maar hoe? Moet sy daarin verdrink of moet dit haar wegspoel?

Daar is nogal verskillende verklarings vir die gedeelte.

Sommige Skrifverklaarders beweer dat die stroom water beteken dat die draak ‘n weermag soldate agter die vrou aanstuur, maar dat ‘n sandstorm die soldate net so toewaai in ‘n kort rukkie se tyd. (Die Skrif openbaar mos dat die aarde die vrou te hulp gekom het en die rivier ingesluk het)
Ander Skrifverklaarders verstaan die beeld so dat die water die verleiding waarmee die duiwel werk (sy slinksheid/agterbaksheid) voorstel.

Baie aanloklik bied die draak iets vir die vrou en die kind aan wat die hardheid en die geweld van hulle vlug versag: water.
Daar is water om te drink - dan is hulle binne bereik van die draak.
Dan vlug hulle nie meer vir hom nie. Trouens dan het hy hulle in sy mag, want hulle is dan van sy genade afhanklik.

Daarom beskik die Here dit so dat die vrou en haar kind hulp kry. In die beeld van die openbaring gebruik die Here selfs die natuur om die kerk te help: die aarde het die vrou te hulp gekom, en die aarde het sy mond oopgemaak en die rivier opgesluk, wat die draak uit sy bek uitgegooi het.

Wanneer dit gebeur, val die duiwel al die gelowiges oor die wêreld aan met volle geweld en sonder enige pretensies. Dan is hy woedend.

En die draak was vertoornd op die vrou, en hy het weggegaan om oorlog te voer teen haar ander nakomelinge wat die gebooie van God bewaar en die getuienis van Jesus Christus hou.

Wat is die punt wat hier geopenbaar word? Dit::

Die satan hou nie van God nie.
Hy hou ook nie van die kerk van God nie.
Hy hou niks van enige mens wat glo nie. Hy stel nie belang om ons vir hom te werf om enige iets positiefs met ons te bereik nie.

Verstaan goed:

Die satan is nie skeppingsmagtig soos God wat die hemel en die aarde geskape het en met die wederkoms ‘n herskepping gaan en kan laat gebeur en ‘n nuwe hemel en ‘n nuwe aarde tevoorskyn laat kom nie.
Hy wil net die hele koninkryk van God hê - en dan breek hy dit en vernietig hy dit. Hy kan niks in stand hou nie.
Die oomblik toe hy onder die genade van God uitbeweeg het, het hy alles wat mooi in hom was, verloor en het hy in sy wese sleg geword.

Ons behoud lê juis in die Kind van die vrou: Die Here Jesus Christus.

Dit is omdat die duiwel van die sondeval af al weet dat sy vernietiging juis in hierdie Kind is wat ons met dieselfde daad gaan verlos, dat die duiwel so hatig is op Jesus.
Hy was daar in die Paradys toe God destyds ons en sy straf uitgedeel het.
En hy was daar toe God uitdruklik gesê het:

En Ek sal vyandskap stel tussen jou en die vrou, en tussen jou saad en haar saad. Hy sal jou die kop vermorsel, en jy sal hom in die hakskeen byt. (Genesis 3:15 AFR53)

Die satan het veral met groot verbystering en ontsetting geluister na die woorde: Hy gaan jou kop vermorsel!
Hy het sy eie grafskrif gestaan en aanhoor: Verslaan en vermorsel deur die Christus wat God is wat uit ‘n vrou gebore is.

Daarom moet ons glo en stry in die bloed van hierdie Kind wat so geweldig deur die draak gehaat word.

Ons het reeds in sy kruisverdienste die oorwinning.
Ons moet net hierdie oorwinning bevestig met ons werke!

Ons moet nie verdraagsaam raak teenoor sonde nie.
En ons moet dink voordat ons iets doen of besluit.
Ons moet met groot onderskeiding inkyk in elke gebeurtenis en sien of dit vir God voordelig is, en of dit bloot verloklikheid van die draak is wat op die lang duur ons begrafnis saam met syne in die hel reël.

Ons is gereddes van God in die bloed van sy Seun, Jesus Christus die Here. Daarom moet ons glo dat die bloed van Jesus Christus teen die kruishout af tot ons verlossing was, en moet ons hele lewe ook daarvan getuig dat ons hierdie boodskap uitdra en uitlewe.

Ons moet besef dat, van die hemelvaart af, die duiwel glad nie so magtig is as wat geredelikerwys deur ons aanvaar word nie. Die Here Jesus Christus het die duiwel klaar verslaan en al wat ons moet doen, is om deur die bloed en regverdigheid van Jesus oor die versoekings van die duiwel te heers.
Amen.

Slotgebed.
Skrifberyming 7-1:1 (31)

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr. M.J. du Plessis
Gereformeerde Kerk Bellville
Datum: 24 Julie 2005 (oggend)