Dr MJ du Plessis Gereformeerde Kerk Bellville Datum: 2 Mei 2004 (oggend)

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 16:1, 3

Geloofsbelydenis

Wet

Psalm 107:5, 6

Gebed

Psalm 2:1

Skriflesing: Openbaring 15:1 – 16:2
Teks: Openbaring 16:2

Toe gaan die eerste een weg en gooi sy skaal op die aarde uit, en kwaai en bose swere het aan die mense gekom wat die merk van die dier gehad het en sy beeld aanbid het.

Die opskrif van hierdie preek is: Die einde - genade en oordeel

Voordat die Here op die wolke verskyn om die laaste oordeel uit te voer, voltrek die engele op sy bevel sy grimmigheid oor die aarde. Daar is sewe engele en elkeen van hulle het ’n skaal wat ’n deel van God se oordeel bevat. Die genade is egter so groot dat net die wat die dier aanbid elke keer die smarte oorkom – die ware gelowiges word deur die Here bewaar van sy oordeel.

Ons kyk na hierdie openbaring van die Here uit die volgende gesigspunte:
1. Die geskiedenis
2. Die oordeel
3. Die verlossing in Christus

1. Die geskiedenis
Omdat die Here ’n God van genade is, word daar eers aan Johannes ’n gesig geopenbaar van hoe dit sal wees as die wêreldgeskiedenis verbygegaan het. Hoofstuk 15:2-4 gryp vooruit na die toestand wat sal heers nadat die sewe engele klaar hulle skale uitgegooi het. Die verlostes sal dan ’n loflied sing oor die gerig wat die Here uitgeoefen het met die plae wat oor die aarde beskik is.

Die bedoeling van die gedeelte is dat die Here eers aan die lesers van die boek twee dinge wil openbaar:

Die eerste is dat die Here wil openbaar dat die plae heilig en regverdig is. Die gelowiges moet dit weet nog voordat Hy hulle beskryf.
Die tweede is dat die Here aan die gelowiges openbaar dat die oordeel wat deur hierdie skaalbakke uitgemeet word, net die ongelowiges gaan tref, en dat dit nie die gelowiges ook gaan vernietig nie.

Al die dinge wat in hoofstuk 15 staan, berei ons voor om die gebeure wat in hoofstuk 16 beskryf word te verstaan. Johannes sien ’n teken in die hemel wat hom in verrukking laat: Daar verskyn sewe engele.

Hierdie engele het priesterklere aangehad (v. 6).

Hulle klere was van rein blink en fyn linne.
Om die bors het hulle goue gordels gedra.

Elke engel het ’n skaalbak in sy hand. Die sewe bakke beteken twee dinge:

Die bakke saam bevat die volle toorn van die Here.
Die getal sewe is simbolies. Dit dui op Goddelike volmaaktheid.

Wanneer hierdie bakke uitgegooi word, breek die eindoordeel oor die aarde aan, waarna die ewigheid by God in die hiernamaals begin. Dit word in hoofstuk 16:17 beskryf.

As ons na die oordele luister, wil ons in vrees verval oor die verskriklikheid daarvan. Beleef die gelowiges wat die laaste oomblikke van ons geskiedenis lewe dit ook so?

Nee, hulle beleef nie die oordele as ’n straf oor hulle nie.
Hulle sien daarin die openbaring van God se almag – die einddoel waarom God die sonde toegelaat het, naamlik dat Hy dit op hierdie punt vernietig sodat Hy daarmee sy Goddelike krag en almag, regverdigheid en genade kan openbaar.

Die bedoeling van die loflied is dat die ware gelowiges die tekens van die tye sal verstaan, en uiters dankbaar is dat die einde aangebreek het.

Al is die eindgerig hoe swaar, die gelowiges is dankbaar! (Sê dit nie dalk iets vir die manier waarop ons beproewinge hanteer nie?!)

In vers 3 en 4 is daar ’n parallel met Exodus 15. Dis die lied wat die Israeliete na die uittog gesing het. Kyk na die ooreenstemming:

Ten opsigte van die inhoud van die lied:

In albei gevalle word ’n lied gesing.
In albei gevalle word dit deur die uitverkorenes van God (verlostes) gesing.

By Moses se lied is Farao se mag verbreek.
By Johannes se lied is die dier en sy beeld en sy teken en die getal van sy naam oorwin.

Ten opsigte van beelde wat ooreenkom:

Moses sing by die Rooi See,
terwyl Johannes ’n see van glas sien.

Die saak word sterk gestel dat daar geen mag is wat op daardie oomblik die regverdigheid van God se dade betwyfel nie:

Omdat U regverdige dade openbaar geword het (15:4).

Die wydheid van Jesus se verlossingswerk word ook geopenbaar:

Almal sien dit en aanvaar dit.
Al die nasies sal kom en voor U aanbid.

Eerste openbaar die Here daarmee dat Hy die God en Heerser oor alle volke is.

Alle mense behoort aan Hom – en uit almal van hulle kom dié na vore wat Hom aanbid.
Veral vir Johannes is dit belangrik, want hy en sy mede-apostels was juis deur die Here gestuur om mense uit alle volke te gaan bekeer en hulle dan te doop en te leer.
Hier het hy dus die vrug van die werk wat deur hulle begin is, gesien.

Vers 5 gryp by alles verby tot op die eerste oomblikke van die Koninkryk self.

Na al die smarte maak die Here die deur van die tempel oop.
Die volmaaktheid begin.
Al die verbondsbeloftes van die Here wat deur die loop van die geskiedenis verkondig is, word in hulle volle helderheid waar.

2. Die oordeel
Daar is twee dinge wat daarop dui dat dit baie belangrike engele moet wees wat hierdie werk gaan uitvoer:

Die eerste is hulle kleredrag wat ooreenstem met die kleredrag van Jesus Christus soos wat Johannes Hom daar op die strand gesien het.

Die beskrywing van hulle kleredrag is om hulle heiligheid te openbaar.

Die tweede is dat hulle nie soos die ander engele die hele tyd op die aarde was nie.

Hulle kom uit die binnekant van die hemel uit, waar hulle dus altyd baie naby aan die Here is.

Vers 7 openbaar hoe een van die vier lewende wesens aan elkeen van die sewe engele ’n goue skaal gee. Elke skaal is vol van God se toorn.

Die vier lewende wesens is die verteenwoordigers van die hele skepping met alles wat daarin lewe (vgl. 4:6).
Die betekenis daarvan is dat die hele skepping aangetas en deurvloei gaan word van die oordeel van die Here.
Dit beteken ook dat die hele skepping die noodsaaklikheid van God se straf insien, en homself in harmonie met God se wil daaraan onderwerp.
Daarom neem een van hulle verteenwoordigers self deel aan die eindoordeel.

Nadat alles gebeur het wat in hoofstuk 15 beskryf is, is die hele toestand en opset reg dat die sewe engele elkeen hulle skale of bakke op die aarde kan uitgooi.

Die tempel is vol rook, wat die volle toorn en heiligheid van God uitbeeld.
Die tyd vir genade en gebede is verby.

Jesus doen ook nie meer voorbidding nie.
Hy self maak Hom gereed om die oordeel te gaan voltrek.

Dan hoor Johannes ’n groot stem in die tempel wat bevele gee. Dis God self wat praat.

Die engele kry opdrag om hulle skaalbakke op die aarde te gaan uitgooi.
Toe die eerste engel sy bak op die aarde uitgooi, het die gramskap van God oor die hele aarde neergekom.

Die gebeure rondom die skaalbakke wat uitgegooi word, sluit (net soos die lied van Moses) aan by die uittoggeskiedenis: In die eindoordeel gebeur die verlossingsgeskiedenis baie soos wat dit gebeur het met die verlossing uit Egipteland.

Dis nie net die lied wat die verloste skare sing wat dieselfde is nie.
Die skale wat uitgegooi word, vertoon ook trekke met die plae wat oor Egipteland gekom het.
Daarmee openbaar die Here dat Hy in die uittoggeskiedenis aangetoon het hoe Hy sy kerk uit ’n sondebevange wêreld gaan verlos wanneer die einde daar is.

Die eerste engel gooi die inhoud van sy skaal se bak op die aarde uit.

Dit val oor alle mense.
Die gevolg daarvan dat hierdie bak se inhoud uitgegooi word, is dat daar geweldige siektetoestande uitbreek.
Die mense kry kwaadaardige en bose swere.

Dis nie ’n nuwe ding dat daar onder mense wat God nie aanvaar nie, of wat hulle teen Hom verset, bose swere uitbreek nie.

Die eerste skaal sluit juis aan by die sesde plaag in Egipteland.
Moses en Aäron moes elkeen ’n dubbele hand vol roet in die lug opgooi.
Die Here het dit toe verander in fyn poeier wat oor die hele Egipteland bose swere aan mense en diere veroorsaak het.
Die towenaars van Farao kon nie eers voor Moses verskyn nie, so vol swere was hulle.

Eksodus 9:11:

En die towenaars kon voor Moses nie staan vanweë die swere nie. Want die swere was aan die towenaars en al die Egiptenaars.

Later in die geskiedenis was daar weer ’n heidense volk – die Filistyne – wat teen Israel oorlog gevoer en hulle verslaan het.

Hulle het toe die ark weggevoer na Filistea toe.
Toe het die Here hulle ook met bose swere getref.

Ons weet dus uit die geskiedenis dat die Here so ’n werkswyse het om ongelowige mense met bose swere te tref wanneer Hy hulle straf. Die swere wat volg op die eerste skaal, lê dus heeltemal in lyn met die normale openbaring van die Here.

3. Die verlossing in Christus
By al die oordeel en grimmigheid van die Here is die genade baie duidelik.

Dis nie alle mense wat dit kry nie.
Net dié wat die merk van die dier gehad het en sy beeld aanbid.

Oor hierdie mense staan daar nog iets belangriks by:

In vers 9 staan daar dat hierdie mense God gelaster het, hulle nie bekeer het om aan God die eer en heerlikheid te gee nie.
Dit is die oorsaak van al die plae wat oor hulle gekom het.

Dit is ook weer dieselfde as wat dit was in die Ou Testament.

Die sesde plaag was mos die bose swere wat oor die Egiptenare gekom het.

Maar die swere het in elk geval niks aan Farao se geloof gedoen nie, want sy hart was verhard.
Die een plaag na die ander het oor hulle gekom, maar hulle het nie tot bekering gekom nie.

In hierdie gedeelte openbaar die Here dat dit presies so sal wees met die eindoordele.

Maar – en dis baie belangrik – dit raak nie die gelowiges nie.
Dit tref net die mense wat die dier en sy beeld aanbid.

Dan vra ons: Waarom kom die gelowiges dan skotvry daarvan af? Word die skaal dan nie oor die hele aarde en al die mense uitgegooi nie?

Die antwoord is dat die Here Jesus die volle straf vir ons sondes voor God gedra het.
Daarom wreek God Hom nie in sy grimmigheid weer ’n keer oor die sondes van die gelowiges nie.

Verder is dit ook so dat die Heilige Gees oor die kerk uitgestort is. As ons dit in verband bring met hierdie skale wat die een na die ander die toorn van die Here oor die aarde uitgooi, sien ons dat die mense wat deur die oordele getref word, nie tot bekering kom nie.

Die werk van die Heilige Gees oor ons maak juis dit presies anders – ons reageer nie soos die ongelowiges nie.

Deur die werk van die Heilige Gees kom die ware gelowige tot bekering wanneer hy deur die Here gestraf sou word oor sy ongehoorsaamheid.
Die Heilige Gees breek dus die element van verharding by die ware gelowige af.
Verder is dit ook so dat die ware gelowige deur die Heilige Gees gelei word om die tekens te kan lees en verstaan.

Johannes begin hierdie gedeelte deur te vertel dat hy juis ’n teken gesien het.

Hy openbaar dan die tekens aan ons sodat die ware gelowige in die eindtyd op die spoor van hierdie tekens sy geloof kan inrig, totdat die Here self kom.
Die Heilige Gees doen dus vir ons wat naby die wederkoms lewe, presies wat die Here voorspel het dat Hy gaan doen:

Hy lei ons in alle waarheid.
En hierdie waarheid is die openbaring van God.

Die Here sê nie wat die bose swere gaan veroorsaak wanneer die eerste skaal uitgegooi word nie. En ook nie hoe dit gaan lyk nie.

Maar dis duidelik dat die swere sal uitkom by mense wat op so ’n manier lewe dat hulle die Here kwaadmaak.
Dit gaan dus op die een of ander manier deur die sonde veroorsaak word.

Dit alles maak die troos vir u soveel sterker.

Die ware gelowiges kan die tekens van die tye lees.
Hulle sien hoe ver God se raadsplan gevorder het, en wat elke keer gebeur.

Die oordeel van die Here bewerk ’n volkome tweedeling onder die mense: aan die een kant is daar die gelowiges en aan die ander kant die ongelowiges.

Daarom verheug die gelowiges hulle in die dinge wat God doen en prys die gereddes die Here met lofsange in hierdie moeilike tye. Hulle blydskap is omdat die Here die wêreld suiwer maak en heilig:

Hulle bely ook dat die oordele van die Here waaragtig en regverdig is.
Die belangrikste van alles is dat God die gelowiges in dié tye bewaar.
Hy beskik dit so dat sy kwaad net oor die ongelowiges woed – die aanbidders van die dier.
Die gelowiges word elkeen in Jesus Christus se verdienste bewaar van die oordeel en van vernietiging.

Amen.

Slotgebed

Slotpsalm 97:1

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr MJ du Plessis
Gereformeerde Kerk Bellville
Datum: 2 Mei 2004 (oggend)