Dr MJ du Plessis Gereformeerde Kerk Bellville Datum: 13 Junie 2004 (oggend)

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 9:1, 7, 9

Geloofsbelydenis: Apostolicum

Wet

Psalm 40:4

Gebed

Psalm 49:6

Skriflesing: Openbaring 16
Teks: Openbaring 16:17

En die sewende engel het sy skaal uitgegooi in die lug, en ’n groot stem het uit die tempel van die hemel gekom, van die troon af, wat gesê het: Dit is verby!

Die sewende skaal word uitgegooi en die einde breek aan.

Die oordeel van God het daarmee in sy finale fase ingegaan.
Al die magte van die hel en ook al hulle eiendom word aan stukke gebreek en vernietig.
Daarmee word die laaste voorbereidings getref vir die wederkoms van die Here.

Ons behandel die preek aan die hand van die volgende indeling:
1. Wêreldtoestand wat die uitgiet van die skaal voorafgaan
2. Teen wie rig die sewende skaal hom?
3. Deur Christus verlos

1. Wêreldtoestand wat die uitgiet van die skaal voorafgaan
Die politieke toestand in hierdie tye sal gekenmerk word deur valsheid en leuens.

Dit sal ook gekenmerk word deur opgeblasenheid en verwaandheid van die leiers. Dink maar aan wat die Bybel leer van die dier en die draak en die valse profeet.
Terselfdertyd beskryf dit ook die toestand in die “kerk” van die eindtyd. Dit sal nie meer ’n ware kerk wees nie. Dink hier maar net aan wat alles gebeur wanneer die sesde skaal uitgegooi word.

Die valse profeet sal die kerk sy tuiste maak, en die sogenaamde gelowiges sal die beeld van die dier aanbid.
Die Ware en Enige God sal nie meer in die kerk wees nie.

Op staatkundige en godsdienstige gebied sal die wêreld op dié tydstip in so ’n toestand wees dat geen ware gelowige meer daarin kan bestaan nie.
Dit sal ’n toestand wees waarin die donker magte die illusie sal skep dat hulle absolute regering oor die hele skepping uitoefen.

Hierdie magte het min vrede met die gelowiges. Hulle vervolg die gelowiges. Die rede daarvoor is ook voor die hand liggend:

Ons het gesien dat hulle met die uitgiet van die vorige skale besef het dat dit die grimmigheid van God is wat oor hulle kom.
Hulle weet dus baie goed dat dit die God van die ware gelowiges is wat in die beheer van die hele toestand staan.
Hulle haat hierdie ware God, want ons lees dat hulle Hom aanhoudend laster oor die smarte wat oor hulle kom.
Daarom vervolg hulle nou die gelowiges wat hierdie ewige God aanbid. Dit is presies wat die Here Jesus al in Matteus 24:21 geleer het dat die gelowiges in die eindtyd geweldig verdruk sal word deur die wêreldmagte.

2. Teen wie rig die sewende skaal hom?
Die ander skale het nou al die plante en die gras en die see en die riviere en die son getref, maar die lug is nog nooit getref nie. Nou word die lug getref.

Die laaste middel wat lewe op die aarde bepaal, word deur die grimmigheid van God getref.
As die lug nie meer daar is nie, sterf alles.

Die sewende skaal maak ’n einde aan alles.

Die apostel Paulus skryf in Efesiërs 2:2 dat die “owerste van die mag van die lug” die ongehoorsaamheid in die mense werk.
Hy skryf in hoofstuk 6:12 dat ons worstelstryd “teen die bose geeste in die lug” is.
Die Bybel skep dus duidelik die indruk dat die antichris sy mag in die lug gevestig het.
Dit beteken dus dat as die sewende skaal in die lug uitgegooi word, die ryk van die antichris vernietig word. Daarmee sluit hierdie skaal aan by die sesde skaal en sy werking.

Met hierdie sewende skaal rig die Here Hom tot die sentrum van die onheilige magte, en vernietig die Here hulle in die hart van hulle bestaan. Daarmee saam word alle lewe op die aarde tot ’n einde gebring.

Dit verklaar waarom vers 17 afsluit met die woorde: Dit is verby!

Die geskiedenis is afgeloop. God se raadsbesluit oor die hele wêreld het sy loop geloop en is presies afgehandel.
Alles wat moes gebeur, het in vervulling gegaan. Die Here het dus sy almag lank en duidelik bewys oor die gang van die geskiedenis.
Nou het die oomblik aangebreek dat God sy heerlikheid in sy oorwinning oor die ryk van die antichris gaan toon.

Meteens is daar magtige tekens in die skepping wat die verskyning van God aankondig:

Daar word stemme gehoor. Dit beeld die misterie rondom die majesteit van God uit.
Verder is daar donderslae en bliksemstrale – dit laat mens dink aan Sinaï toe die Wet gegee is.
Daar kom ’n groot aardbewing – die grootste aardbewing wat ooit oor die aarde gekom het.

Die aardbewing is nie vreemd nie, want die Here Jesus het dit ook voorspel.
Daarby is die aardbewing ’n simbool van vernietiging van die aarde.

Kyk na die effek van die aardbewing:

Daar is ’n groot stad – waarskynlik die hoofstad waar die hoofkwartier van hierdie magte gesetel is.
Hierdie stad breek in drie dele. Waarskynlik gebeur dit as gevolg van die geweld van die aardbewing wat die aardkors laat skuif en die stad opbreek.
Die stede van die nasies val. Alles stort inmekaar as gevolg van die geweld van die aardbewing.

Die hele skepping sukkel om die geweld van die laaste skaal te hanteer:

Die eilande vlug weg. Hulle verdwyn net onder die oppervlak van die see.
Op die vasteland gaan dit nie beter nie, want die berge raak weg – hulle is net nie meer daar nie – is hulle gelykgeskud, of sak hulle in die aardkors weg? Niemand weet nie! Hulle is net nie meer daar nie.

Die betekenis hiervan is dat groot getalle mense doodgaan.

As die eilande wegraak in die see, verdrink al daardie mense.
Dieselfde geld van die berge en die mense wat daarby betrokke is.
Die aardbewing laat geboue op mense inmekaartuimel.
Dit sal baie duidelik wees dat die verskriklikheid wat gebeur, die straf van die Here is oor die goddeloosheid van die mense op die aarde.

Waarskynlik is daar nog mense iewers aan die lewe. Dan kom hierdie verskriklike haelstorm.

Die haelstene is elkeen omtrent ’n talent swaar – sowat 50 kilogram.
Sulke hael gaan doodgewoon geboue en mense, diere en plante van die aarde af weg vermorsel.

Agter alles sit die hand van die Here. Die spesifieke beskrywing dat hierdie haelstene uit die hemel val, vertel juis dit. Dit word van bo af, van God af, beskik.

En die verstommendste van alles:

Die mense het God gelaster oor die plaag van die hael, omdat sy plaag ontsettend groot was. Daar is geen bekering nie.
Hulle bely God wel as die Almagtige en as die Beskikker van alles, maar daar is nie aanbidding en bekering nie. Net verharding en haat teen God.

3. Deur Christus verlos
Ons moet nie, wanneer ons die gebeure rondom die sewende skaal lees, vergeet wat die Here aan die begin van hierdie boek gesê het nie.

In die eerste paar verse van die boek Openbaring sê die Here dat Hy aan Johannes openbaar wat gaan gebeur.
Maar Hy toon tog ook aan dat Hy deur al hierdie dinge sy kerk bewaar.

Daar staan in hoofstuk 1:5-7 dat Hy ons liefgehad het en ons van ons sondes gewas het in sy bloed.

…en van Jesus Christus, die getroue getuie, die eersgeborene uit die dode en die Owerste oor die konings van die aarde! Aan Hom wat ons liefgehad het en ons van ons sondes gewas het in sy bloed en ons gemaak het konings en priesters vir sy God en Vader, aan Hom die heerlikheid en die krag tot in alle ewigheid! Amen. Kyk, Hy kom met die wolke, en elke oog sal Hom sien, ook hulle wat Hom deursteek het; en al die geslagte van die aarde sal oor Hom rou bedryf; ja, amen! Ek is die Alfa en die Oméga, die begin en die einde, sê die Here, wat is en wat was en wat kom, die Almagtige. (Op. 1:5-7 AFR53)

Hy het ons konings en priesters vir sy God en Vader gemaak!
Kyk, Hy kom met die wolke, en elke oog sal Hom sien, ook hulle wat Hom tydens die kruisiging gemartel het!

Die Here noem Homself: Ek is die Alfa en die Oméga, die begin en die einde, sê die Here, wat is en wat was en wat kom, die Almagtige!

Daarmee teken die Here tog uitdruklik dat hierdie verskriklike eindoordele nie gerig is op die kerk nie.
Dis gerig op sy vyande – maar die eindproduk daarvan is die verheerliking van die Here en ook die heiliging en verheerliking van sy kerk.

Presies dit kom ook uit in die woorde van die Here dat die mense die Here swaar sal laster wanneer die laaste skaal in die lug uitgegooi word.

Dis nie die kerk wat die Here laster nie.
Dis die ongelowiges – die aanhangers van die antichris wat die magteloosheid van hulle eie verlossingspogings ervaar wanneer God sy oordele oor hulle voltrek.

Die heerskappy van Christus staan vas.

Hy het as oorwinnaar opgestaan uit die dood nadat Hy as Veldheer met onbeperkte mag die dood ingegaan het en die dood verslaan het.
Nou verslaan Hy die mag van die antichris.
Met die laaste vestings van die magte van die hel wat val, verskyn Hy in die hemel as die Onoorwinlike en Ewige, en Almagtige.

Die laaste oomblikke van die aarde se geskiedenis word gekenmerk deur aardbewings en stede wat in puin neerstort, en haelstene wat alles inmekaar laat val.

Dan kom God met majesteit.
In baie skerp kontras met die ellendes wat deur die sewende skaal veroorsaak word, daal die Nuwe Jerusalem dan uit die hemel neer, waarin die Almagtige God sy uitverkorenes in heerlikheid bymekaarmaak.

Broeders en susters, moenie die eindgeskiedenis vrees nie. Ook nie die magte van ons tyd wat met soveel moord en geweld hulle hande op alles probeer lê om alles in hulle mag te kry nie. Weet:

Die Here regeer.
Die laaste ding wat Hy doen voordat alles verby is, is om ’n engel te stuur om die sewende skaal in die lug uit te gooi, en dan elke vorm van mag van die hel te verbreek.
Daarmee openbaar die Here aan u die gemak waarmee Hy oor alles regeer, en alle teëstand voor Hom wegvee.
Dit alles sodat ons in ewige heerlikheid voor sy troon kan lewe.

Amen.

Slotgebed

Skrifberyming 18-7:1, 12 (45:1, 12)

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr MJ du Plessis
Gereformeerde Kerk Bellville
Datum: 13 Junie 2004 (oggend)