Dr MJ du Plessis Gereformeerde Kerk Bellville Datum: 5 November 2006 (oggend)

Sing vooraf: Psalm 89:7

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 33:1, 7
Geloofsbelydenis: Apostolicum
Wet
Na die wet bely die grootheid van die Here, en dat Hy alleen vir ons ’n ewige woning kan gee met Psalm. 84:2.
Psalm 84:2

Gebed

Doksologie:
Aanbidding:
Skuldbelydenis:
- Vergifnis:
Dank:
Smeking vir die nood van die gemeente en voorbidding vir die kerk, owerhede en sondige wêreld, asook die beroep op die beloftes van God
Algemene bede:
Verligting van die Gees ter wille van die Woorddiens:

Amen.

Psalm 24:4

Skriflesing: Openbaring 2; Lukas 16:19-31; 1 Tessalonisense 4:13-18
Teks: Openbaring 2:10, 11

Vrees vir niks wat jy sal ly nie. Kyk, die duiwel gaan sommige van julle in die gevangenis werp, sodat julle op die proef gestel kan word; en julle sal tien dae lank verdrukking hê. Wees getrou tot die dood toe, en Ek sal jou die kroon van die lewe gee. (Openbaring 2:10 AFR1953)

Wie ’n oor het, laat hom hoor wat die Gees aan die gemeentes sê. Die wat oorwin, sal deur die tweede dood geen skade ly nie. (Openbaring 2:11 AFR1953)

Teen die agtergrond van die aantal gesinne in ons gemeente wat die afgelope tyd weer deur die dood besoek is en ook vrae wat daar rondom bestaan, gee ons vandag aandag aan wat die Bybel leer van die dood.

Altyd deur het mense maar bekommernisse en spanning gehad wanneer daar van hulle geliefdes doodgegaan het.

Daarom het die Here hierdie gedeelte in 1 Tessalonisense 4 in sy openbaring ingevoeg – nogal met ’n beroep op ons dat Hy nie wil nie hê dat ons onkundig moet wees oor wat met die ontslapenes gaan gebeur nie.
Hy openbaar aan ons dat ons juis moet weet wat met die ontslapenes gebeur sodat ons nie treur soos die ander wat geen hoop het nie.

Die Bybel is die enigste plek waar ons die Here se openbaring hieroor kan kry, en waar ons oor die dinge getroos kan word. Daarom gaan soek ons daar vir antwoorde.

Ons ondersoek die volgende:
1.      Wat is die eerste dood en die eerste opstanding waarvan die Bybel praat?
2.      Wat is die tweede dood en die tweede opstanding wat geen houvas op die ware gelowiges het nie?

1.      Wat is die eerste dood en die eerste opstanding waarvan die Bybel praat?

Ons onverstaan oor die dood gaan reguit terug na die sondeval toe. Daar het alles skeefgeloop. Daar het ons hierdie diep vrees ontwikkel dat die dood die straf van die Here oor ons sondes is – en wie vrees nie die oordeel van die Here oor sy sondes nie?

Dit het begin toe die woorde van die Here geval het dat ons van die sondeval af die doodstraf oor ons sondes het en dat die aarde vervloek is om ons ontwil.
Van daardie oomblik af het ons nie meer vrye toegang na die Here toe gehad nie.
- Ons ongeregtighede moet nou eers gestraf word voordat ons vrede met God kan hê.
- Daarby is ons ook tot die dood toe siek, want ons totale geestelike ingesteldheid het ’n geweldige knou gekry met die sondeval.
- Dit is ’n baie moeilike toestand waarin ons beland het.

Maar die Here het voorsien dat daar iets gebeur dat ons gesond kan word, met ander woorde uit die ewige doodstraf wat op ons gelê is, kan uitkom en weer kan lewe – hierdie keer tot in ewigheid.

Dit is u troos: ons gaan opgewek word uit die dood. Luister hoe reguit en helder word dit beskryf in Romeine 8:11:

En as die Gees van Hom wat Jesus uit die dode opgewek het, in julle woon, dan sal Hy wat Christus uit die dode opgewek het, ook julle sterflike liggame lewend maak deur sy Gees wat in julle woon. (Romeine 8:11 AFR1953)

Dit gaan letterlik oor ons liggaamlike opstanding uit die dood: ...ook julle sterflike liggame lewend maak...

Hoe werk die dood? Wat gebeur wanneer ek sterf?

Ons is deur die Here onsterflik geskape.

Ons dood hier is net die aflegging van ons liggame.
As ons liggame doodgaan, lewe ons onverpoosd, sonder om een oomblik nie daar te wees nie van hierdie lewe af tot voor die troon van die Here.
Ons noem dit die eerste dood. Alle mense sterwe die eerste dood.

Ook sal hy bang wees vir ’n hoogte, en verskriklike dinge sal op die pad wees! En die amandelboom sal in bloei staan, en die sprinkaan sal homself met moeite voortsleep, en die kapperkruid nutteloos wees; want die mens gaan na sy ewige huis, en die rouklaers sal op die straat rondgaan. (Prediker 12:5 AFR1953)

Daardie oomblik is dit die finale skeiding tussen die mense – en dan is ons ook by die laaste omdraaipunt van glo of nie glo nie, verby.

Onmiddellik is ons op daardie oomblik óf in die hemel óf in die hel.
Hiervoor kyk ons na die gelykenis van die ryk man en Lasarus wat elkeen onmiddellik by hulle finale blyplek aangekom het. Dink ook aan wat die Here vir die rower langs hom aan die kruis gesê het:

En Jesus antwoord hom: Voorwaar Ek sê vir jou, vandag sal jy saam met My in die Paradys wees. (Lukas 23:43 AFR1953)

Dit is die eerste opstanding.

Hierdie toestand duur nie lank nie – dit hou net solank as wat die aardse tyd aangaan.

Die oomblik wanneer die Here kom, verander alles meteens. Niks is dan meer dieselfde nie.
Die verandering en alles wat daarmee saamgaan, word aan ons geopenbaar in 1 Tessalonisense 4. Dan gebeur die tweede opstanding.
Ons het sopas saam daarvan gelees in 1 Tessalonisense 4:16:

Want die Here self sal van die hemel neerdaal met ’n geroep, met die stem van ’n aartsengel en met geklank van die basuin van God; en die wat in Christus gesterf het, sal eerste opstaan. (1 Tessalonisense 4:16 AFR1953)

Wanneer die bevel gegee word en die stem van die aartsengel en die trompet van God weerklink, sal die Here self uit die hemel neerdaal. Allereers sal dié wat in Christus gesterf het, uit die dood opstaan; (1 Tessalonisense 4:16 AFR1983)

Daar is niemand wat hierdie oomblik misloop nie.

Die Here gaan ’n bevel gee dat alle dooies se liggame uit die grond of waar hulle ook al is, moet opstaan en herskep word.
Natuurlik word almal nie herskep om by die Here op die nuwe aarde te wees nie. Party gaan reguit hel toe – met hulle liggame en siele wat dan weer verenig is met mekaar.

En ek het die dode, klein en groot, voor God sien staan, en die boeke is geopen; en ’n ander boek, die boek van die lewe, is geopen. En die dode is geoordeel na wat in die boeke geskryf is, volgens hulle werke. En die see het die dode gegee wat daarin was, en die dood en die doderyk het die dode gegee wat daarin was; en hulle is geoordeel, elkeen volgens sy werke. (Openbaring 20:12-13 AFR1953)

Wat word van die mense wat dan nog nie doodgegaan het nie?

Hulle word op dieselfde oomblik deur die Here verander: Hulle word dan net so volmaak en verheerlik soos die gelowiges wie se siele saam met die Here Jesus teruggekom het van die hemel af en met hulle liggame verenig is.
Ons het gehoor dat die Here vir ons gesê het:

Daarna sal ons wat in die lewe oorbly, saam met hulle in wolke weggevoer word die Here tegemoet in die lug; en so sal ons altyd by die Here wees. (1 Tessalonisense 4:17 AFR1953)

Die dood word gevolg deur die opstanding. Daarvan is die opstanding van Jesus u bewys.

Ons lewe na die dood is so seker deur God gewaarborg dat ons beskou word asof ons nou al reeds in die hiernamaals is.

Daar staan nie dat ons eers eendag daar sal kom nie.
Die feit is so oorweldigend sterk dat die Bybel leer dat ons reeds saam met Christus daar is.

Salig en heilig is hy wat deel het aan die eerste opstanding; oor hulle het die tweede dood geen mag nie, maar hulle sal priesters van God en van Christus wees en sal saam met Hom as konings regeer duisend jaar lank. (Openbaring 20:6 AFR1953)

2. Wat is die tweede dood waarvan die Bybel praat – dit wat geen houvas op die ware gelowiges het nie?

Ons lees van hierdie verskriklike gebeurtenis in onder andere die volgende Bybelgedeeltes:

Openbaring 20:14: En die dood en die doderyk is in die poel van vuur gewerp. Dit is die tweede dood.

Openbaring 21:8: Maar wat die vreesagtiges aangaan en die ongelowiges en gruwelikes en moordenaars en hoereerders en towenaars en afgodedienaars en al die leuenaars hulle deel is in die poel wat brand met vuur en swawel: dit is die tweede dood.

U het opgelet dat die Bybel ’n paar keer sê dat die gelowiges eerste opstaan.

Hulle liggame word op God se bevel eerste opgewek en met hulle siele verenig.
Hulle gaan die Here dan tegemoet in die lug – hulle word dus deur Hom weggeneem van die aarde af.

Dan gaan die opstanding verder: Die res van die mense staan ook op op God se bevel. Hulle liggame en siele word ook met mekaar verenig. Maar hulle eindbestemming en hoe hulle hanteer word om daar te kom, is heeltemal ’n ander saak.

Ons lees in Openbaring14 dat die Here hierdie oordeel opdra aan ’n engel – en hy werk rof met daardie mense.

En ’n ander engel het uitgekom uit die tempel wat in die hemel is, en hy het ook ’n skerp sekel gehad; en ’n ander engel wat mag oor die vuur gehad het, het uit die altaar uitgekom en met ’n groot stem geroep na hom wat die skerp sekel het, en gesê: Slaan jou skerp sekel in en samel die trosse van die wingerdstok van die aarde in, want sy druiwe het ryp geword. En die engel het sy sekel oor die aarde laat gaan en die wingerdstok van die aarde afgeoes en dit gegooi in die groot parskuip van die grimmigheid van God. En die parskuip is buitekant die stad getrap, en bloed het uit die parskuip gekom tot aan die tooms van die perde, twee honderd myl ver. (Openbaring 14:17-20 AFR1953)

Feit is:

Die Here Jesus Christus openbaar Homself as ’n lewende Redder, wat meegevoel het met ons pyn, en ook self daarmee moet meelewe.
Hy openbaar Hom as die Een wat reeds die dood oorwin het, en wat ons ook oor die dood gaan laat oorwin – dit is die betekenis van hierdie brief.
Die Here weet van al ons smarte, maar Hy bemoedig ons.
- Hy wil hê ons moet weet en glo dat die smarte ’n grens het wat dit nie kan oorsteek nie, maar ons gaan deur sy verdienste daardie punt verbysteek, en dan gaan ons sonder hartseer en smarte by Hom wees in ewigheid.

Kan u dink hoe dikwels ’n gemeentelid homself afgevra het:

“Is dit alles die moeite werd?”
Is ek nie dalk gek om deur soveel pyn te gaan ter wille van Jesus Christus nie?”

Nou kom ons by die saak waaroor dit hier gaan. Is geloof in die Here Jesus Christus die moeite werd?

Dit is geen geheim dat Christenwees in hierdie lewe baie ellendes oor ons bewerk nie.
Daar kom nie net dinge soos die dood waaroor ons spanning en pyn het nie.
Daar is ook baie ander dinge wat in wese dieselfde ellendes as dood op die aarde in hulle dra.

Die Here Jesus belowe ons uitkoms uit al hierdie ellendes deur die versoening wat Hy aan die kruis bewerk het.

Hierdie uitkoms klink nou so maklik, maar dit het nie so maklik gebeur nie, want die Bybel openbaar dat Jesus in die versoenings- en verlossingsproses deurboor is.

Hy is ook verbrysel en Hy is gestraf.
Uiteindelik was Hy vol wonde.

Die Nuwe Testament beskryf dit so volledig: Alles het uitgeloop op Jesus se dood en op sy opstanding.

Die Here leer dat Hy self gaan sterf het omdat Hy oor ons bewoë is. Die dood van die Here Jesus Christus was om die straf te dra.
Sy opstanding was om die lewe te verwerf en uit te deel en om ons ook uit die dood te laat opstaan.
Sy wederkoms is om te vervul wat Hy beloof het.

Jesaja sê dit was sodat ons gesond kon word. Luister hoe stel Jesaja dit (53:5):

Maar Hy is ter wille van ons oortredinge deurboor, ter wille van ons ongeregtighede is Hy verbrysel; die straf wat vir ons die vrede aanbring, was op Hom, en deur sy wonde het daar vir ons genesing gekom. (Jesaja 53:5 AFR1953)

Die Here vereis van ons om dit te glo. 1 Tessalonisense 4:14.

Ons het saam gelees wat ons moet glo:

Want as ons glo dat Jesus gesterwe en opgestaan het, dan sal God ook so die wat in Jesus ontslaap het, saam met Hom bring. (1 Tessalonisense 4:14 AFR1953)
Hier is natuurlik ’n probleem met die handskrifte wat aan ons oorgelewer is. Daarom sal u oplet dat die 1983AV effens anders lees:

Ons glo immers dat Jesus gesterwe maar ook opgestaan het. Net so glo ons ook dat God saam met Jesus die ontslapenes wat in Hom geglo het, na Hom toe sal neem.

Die een lesing leer dat die Here Jesus die dooies na Hom toe neem en die ander een leer dat die Here Jesus hulle saambring wanneer Hy weer kom. Wesenlik leer beide dat die dooies by die Here eindig!

Luister wat God leer:

Romeine 6:6, 8 leer dat God ons liefhet.
Daarom wou Hy ons nie in die hande van die Satan laat, waar ons onsself beland het met die sondeval nie.
Hy het sy Seun gestuur om die dood vir ons te oorwin sodat ons weer God se genade kan ervaar.

Toe ons nog swak was, het Jesus op die regte tyd vir die sondaars gesterf. Daarom staan daar in Romeine 14:9 dat Jesus gesterf het, en opgestaan het om oor die dooies en die lewendes te regeer.

Dit beteken dat ons nou ook deur Hom regeer word.
Dan kan die dood en die graf nie die laaste sê oor ons hê nie, want Jesus lewe dan, en Hy regeer uit die hemel oor sy gelowiges.

Jesus het mos gesê dat Hy lewe en ons sal lewe (Johannes 14:19).

Dit beteken dat ons lewe inderdaad eers in sy volle werklikheid na hierdie aardse lewe begin.
Dit word ook baie sterk onderstreep deur Efesiërs 2:4-6 waar daar geskryf staan dat ons al reeds saam met Christus opgewek is, en reeds saam met Hom in die hemel is.

Teen hierdie agtergrond klink die Here Jesus se woorde in Openbaring 22:13 waar Hy Homself aan ons bekendstel:

Ek is die Alfa en die Oméga, die begin en die einde, die eerste en die laaste. (Openbaring 22:13 AFR1953)

Hy is die Eerste en die Laaste.

Hy het mag oor lewe en dood, want Hy het die dood oorwin.
Hy het dus ook die krag en mag om ons in ons lewenstryd te laat oorwin.

Ons moet in al ons ellendes net na die Here toe kyk.

Hy voer ons by ons stryd en lyding verby, na die ewige lewe toe waar Hy is.
Hy het aan die kruis al ons wat opreg glo, se smarte en die dood omskep in ewige lewe, vreugde en heerlikheid vir sy kerk.

Dit is die groot troos waarvan die Here praat in hierdie gedeelte.

Ware kinders van die Here; werklike liefhebbers van God en sy Woord, word deur die Here Jesus bemin en beskerm, sodat hulle by die tweede dood nie die hel in die gesig kyk nie, maar in die hemel ingaan deur God se genade.
Daarom is daar groot rykdom daarin as jy al die verdrukking wat oor jou kom, tot eer van God kan hanteer.

Daarom spreek die Here in vers 10 sy genade oor die ware gelowiges uit:

Kyk net wat gaan hier aan: Die Here gaan nie die dinge wat die lyding veroorsaak verwyder nie.

Trouens, die Here onderstreep dit dat daar baie lyding oor die gelowiges gaan kom, en Hy lê klem op die bewerker van alles: die duiwel.

Kyk die duiwel gaan sommiges van julle in die gevangenis werp, sodat julle op die proef gestel kan word,...

Die duiwel is die bewerker van alles wat met lewe en geluk en vrede in kontras staan. Ons moet natuurlik nie die genade in die saak miskyk nie.

Die Satan kon nog nooit iets duursaams bewerk nie. Hierdie gedeelte preek dit veral sterk.
Aan die kruis verwoes die Here Jesus die duiwel se werk.
- Hy vernietig al die ellendes wat die duiwel bewerk – veral die dood en alles wat daarmee saamgaan.
- Hy vervang dit met die kroon van die ewige lewe wat Hy aan ons gee. Ons oorleef die tyd van verderf.
- Dit wat God ons in die Here Jesus Christus gee, is langer en meer duursaam as die Satan se werke en hulle gevolge.
  - Daar staan ook dat die tydperk van vervolging 10 dae is.
  - Die getal is simbolies, en dui bloot aan dat die Satan heeltemal beperk is – hy is so begrens deur die Here dat hy nie eers self kan besluit hoe lank hy die gelowiges wil verdruk nie.

Die vervolging word afgesluit met die kroon van die lewe wat ons van die Here Jesus ontvang. Dus: koningskap om met lewe te regeer oor die dood en verderf. Wat meer kan ’n mens vra?

Gemeente van die Here, die Here se boodskap aan u is dat u geen lyding moet vrees nie, want alle lyding oor ons is tydelik en begrens. Dit breek nie saam met ons deur in die ewigheid in nie. Wees getrou tot die dood toe, want met die dood verander ons stryd en hartseer in die lewe van ’n koning wat saam met God leef in volmaaktheid.

Amen.

Slotgebed
Slotpsalm 47:4

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr MJ du Plessis
Gereformeerde Kerk Bellville
Datum: 10 Desember 2006 (oggend)