Dr MJ du Plessis Gereformeerde Kerk Bellville Datum: Hemelvaart 20 Mei 2004

Sing vooraf: Skrifberyming 8:1, 4, 5 (5-3:1, 4, 5); Skrifberyming 7:5 (5-2:5) (wysie Psalm 147); Skrifberyming 37:2 (2-7:2)

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 2:4

Gebed

Skrifberyming 9:4 (18-1:4)

Skriflesing: Openbaring 5
Teks: Openbaring 5:13

En elke skepsel wat in die hemel en op die aarde en onder die aarde en wat op die see is, en alles wat in hulle is, het ek hoor sê: Aan Hom wat op die troon sit, en aan die Lam kom toe die lof en die eer en die heerlikheid en die krag tot in alle ewigheid! (AFR83)

Op Patmos is Johannes in die gees in die hemel.

Hy sien en hoor onuitspreeklike dinge.
Hy sien die Here Jesus Christus wat weggevaar het van die aarde af in sy heerlikheid.
Hy sien ook hoe die werk van Jesus Christus in vervulling gaan.

Kom ons kyk in hierdie preek na die volgende twee sake:
1. Ons ewige Koning se vertrek van die aarde af
2. Ons ewige Koning regeer uit die hemel

1. Ons ewige Koning se vertrek van die aarde af
Die dinge in die hemel is meer as wat die mense kon sien tydens Jesus se hemelvaart, want dit was so ’n eenvoudige gebeurtenis.

Hy het voor die oë van sy dissipels opgevaar.
’n Wolk het tussen Hom en hulle ingeskuif.

Ons weet dat daar dinge was wat die mense nie gesien het nie, wat verskriklik was, naamlik dat die duiwel en sy magte Jesus probeer aanval en vernietig het nadat die wolk Hom van die dissipels geskei het, en dat Michael en sy engele teen die duiwel uitgetrek en hulle verslaan het.

Psalm 47:6 het al geprofeteer dat God opvaar met ’n gejuig; die Here vaar op met basuingeklank.
Die basuin is in die Ou Testament geblaas om die aankoms van ’n koning aan te kondig, maar ook om oorlog en die aanval van die vyand aan te kondig. Psalm 47 het altwee geprofeteer.
Die oorlog was tussen Michael die aartsengel en die duiwel, terwyl die hoogste Koning in die hemel aangekom het waar die engele en die geestesmagte gejuig en gejubel het oor sy oorwinning.

Die Bybel openbaar daarmee hoe die lyde van Jesus oorgegaan het in sy oorwinning. Van die spot van die kruis af het Hy vertrek en sy plek gaan inneem as die ewige God en Regter wat oor almal en alles gaan oordeel.

Voordat Hy kom as Regter doen Hy nog eers iets anders: Hy berei in sy koninkryk plek voor vir dié vir wie Hy aan die kruis die ewige lewe verwerf het.
Dit is waarom ons in ons belydenisskrifte bely dat Jesus ons ten goede in die hemel is.

In die koninkryk van God word die seën van Jesus Christus oor ons ten volle waar.

Tydens sy aardse lewe het ons oral brokstukke daarvan gesien.

Hy het gedurig sy seën oor gelowiges – en daarmee oor die kerk – uitgespreek.
Dink aan wat Jesus alles gesê het: “Salig is hulle wat glo” en “Jou sondes is vergewe.”

Lukas sluit sy evangelie met ’n beskrywing van die hemelvaart waarin die volgende staan: “En Hy het sy hande opgehef en hulle geseën. En terwyl Hy hulle seën, het Hy van hulle geskei en is in die hemel opgeneem (Luk. 24: 50, 51 AFR53).
Die seën van Christus is dat ons soos Hy uit die dood opgewek sal word sodat ons met ons liggaam en siel in sy koninkryk sal ingaan met sy wederkoms.

Ons leef in ’n tyd waar mense alles met die wetenskap wil verklaar. Tot elke wonder wat deur die Here gedoen is en in die Bybel opgeteken is, moet verklaar word. Dinge wat nie wetenskaplik verklaar kan word nie, word normaalweg verwerp. Daarom is daar in ons tyd weer allerhande dinge aangaande Jesus wat in die spervuur kom.

Die maagdelike geboorte word verwerp.
Die opstanding uit die dood word nie aanvaar nie.
Met die hemelvaart en Jesus se bestemming het die wetenskap geen raad nie. Daarom is daar groeiende ongeloof hieroor onder die mensdom oor die algemeen.

Dit is natuurlik so dat mens die liggaamlike opstanding en hemelvaart van Christus net in die geloof kan aanvaar en verstaan.

Daarom het dit ook net vir die gelowiges betekenis.
Dit is net vir die gelowiges wat dit belangrik is om te weet wat met hulle gaan gebeur na hulle dood:

Hulle liggame gaan net soos Jesus s’n uit die dood opgewek word.
Hulle gaan met liggaam en siel – soos Jesus – in die koninkryk van God ingaan.

Die hemelvaart is ’n bewys van God se almag.

Voor die oë van mense het Hy met sy liggaam van die aarde af na die hemel toe gegaan.
Dit is die bewys dat Hy alle liggame – ook ons s’n – so van die aarde af na die hemel toe kan laat gaan.

Die feit dat Jesus met sy liggaam hier weg is, beteken nie dat Hy daarmee van ons afgesny geraak het nie.

Ons moet altyd onthou dat Jesus en die Vader en die Heilige Gees een Wese is – een God.
Omdat Hy en die Heilige Gees Eenswesens is, is Jesus deur die Heilige Gees nog steeds by ons.
Dit is waarom daar in ons belydenis staan:

. . . dat Hy ons sy Gees as teëpand stuur, deur Wie se krag ons soek wat daarbo is, waar Christus is aan die regterhand van God en nie wat op die aarde is nie. (HK Sondag 18 vraag 49).

2. Ons ewige Koning regeer uit die hemel
Johannes sien dat daar in God se regterhand ’n merkwaardige boekrol lê.

Gewone boekrolle is net aan die binnekant vol geskryf.
Maar hierdie boekrol is aan die binne- en buitekant vol geskryf.
Op die boekrol is God se beplanning van die wêreld en sy geskiedenis neergeskryf.
Die betekenis daarvan dat die boekrol aan albei kante vol beskryf is, is om daarmee simbolies aan te toon dat die Here elke ding so deeglik uitgewerk het dat daar geen tyd of ruimte vermors is nie.

Die boekrol veroorsaak spanning in die hemel. Enigeen in die hemel of op die aarde word gedaag om die seëls van hierdie boek oop te breek. Daar was niemand wat dit kon doen nie. Nie eers een van die magtigste engele het dit gewaag nie.

Johannes het verstaan wat dit beteken.

As hierdie boek se seëls nie gebreek word nie, kan die wêreldgeskiedenis nie ontwikkel nie.
Dit beteken dat die heerlikheid van God nie aan ons geopenbaar kan word nie,
en dat die ewigheid na die dood, saam met die nuwe hemel en die nuwe aarde, nie sal kom nie.

Een van die ouderlinge het Johannes se aandag daarop gevestig dat die seëls tog gebreek gaan word.

Daar was ’n Leeu wat dit gaan doen (v. 5).
Toe Johannes opkyk, sien Hy dat dit nie ’n leeu is nie maar ’n Lam wat daar in die middel staan asof Hy geslag is.
Dit beteken dat hierdie Lam tekens aan Hom gehad het omdat Hy gewelddadig doodgemaak is.
Daarby het Hy nog ’n aantal ander merkwaardige eienskappe ook:

Hy het sewe horings.
Dit simboliseer volmaakte en Goddelike krag.

Die toepassing daarvan is dat Jesus Christus die Goddelikheid en krag het om regering uit te oefen oor alles wat in tyd en ewigheid gebeur. Daarom val almal in die hemel op hulle gesigte neer toe Hy die boek neem om dit oop te maak.

Hulle sing dan ook ’n lied waarin die vermoë van die Lam bevestig word:

U is waardig om die boek te neem
en sy seëls oop te maak,
want U is geslag
en het ons vir God gekoop
met U bloed
uit elke taal
en volk en nasie.

’n Praatkoor van al die engele en alle ander lewende wesens in die Hemel sluit daarby aan:

Die Lam wat geslag is,
is waardig om te ontvang
die krag en rykdom
wysheid en sterkte en eer en
heerlikheid en lof.
Aan Hom wat op die troon sit,
en aan die Lam kom toe
die lof en die eer
en die heerlikheid en die krag
tot in alle ewigheid Amen!

Al hierdie dinge wat daar in die hemel gebeur, vat die oorwinning van Jesus Christus saam:

Die feit dat Jesus sy lewe afgelê het, opgestaan het uit die dood en dat Hy daarna hemel toe gevaar het.
Die Lam is op die aarde geslag, maar het toe na die hemel toe gegaan en daar is Hy ’n Leeu wat met krag en mag regeer.
Uit die hemel bepaal Hy die wêreldgeskiedenis en regeer Hy nou daaroor.
Sy almag word ondubbelsinnig en duidelik gestel deur die feit dat almal in die hemel Hom aanbid, en aan Hom as die God van die geskiedenis die eer gee.

Kom ons gaan vir ’n oomblik terug na die gedeelte wat ons in die openbaringe aan Johannes gelees het. Wat moet ons met die beeld van die Leeu en die Lam maak?

Die Leeu kom om te verskeur, want die tyd van genade gaan verby.

As Christus op die wolke terugkom, gaan Hy beslis geen weerstand teen Hom duld nie.
Dan voltrek Hy die eindoordeel en maak Hy die finale skeiding tussen alle magte in die hemele en op die aarde.

Die Lam het die versoeningswerk gedoen.

Hy het genade gegee aan almal wat glo.
Hy bid elke dag vir ons en Hy maak plek gereed waar Hy ons in die hiernamaals gaan ontvang.

Ons verwag nie meer die Lam nie. Sy werk is gedoen. Ons wag nou vir die Leeu wat die ewige lewe oor ons gaan laat aanbreek.
Amen.

Slotgebed

Slotpsalm 68:15

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr MJ du Plessis
Gereformeerde Kerk Bellville
Datum: Hemelvaart 20 Mei 2004