Dr. M.J. du Plessis Gereformeerde Kerk Bellville Datum: 27 Julie 2003 (aanddiens).

Ons hulp is in die Naam van die Here wat die hemel en die aarde geskape het.
Geliefdes, genade en vrede vir u van God ons Vader en die Here Jesus Christus deur die kragtige werking van God die Heilige Gees.
Amen.

Lofpsalm 150:1.

Gebed.

Psalm 40:4

Skriflesing: Prediker 7.
Teks: Kategismus Sondag 03. Prediker 7:29
Kyk, dit het ek uitgevind: dat God die mens reg gemaak het, maar hulle het baie slim planne gesoek.

Ons het almal die Bybel tot ons volle beskikking. Alles wat nodig is vir ons saligheid, asook alles wat ons nodig het om die Here behoorlik te kan eer, is in ondubbelsinnige taal in die Bybel neergeskryf. Daarom is daar nie 'n enkele een van ons wat daarop kan aanspraak maak dat hy nie in staat is om uit te vind hoe en waarom die almagtige Here die hele skepping tot stand gebring het nie. Dit word baie duidelik en in volle waarheid geopenbaar hoe die Here alles tot stand gebring het - ook die mens.

Wanneer ons egter met die opregte begeerte om verlos te word, ons eie wese en die werke van God uit die Bybel ondersoek, vind ons met beskaming die gebrokenheid van ons eie werke. Maar terselfdertyd vind ons ook uit van die verlossing en hoop wat ons het in die Here Jesus Christus.

Ons kyk vanaand na vier verskillende sake in hierdie preek:
1. Die werk van God in die skepping van die mens.
2. Die duiwel se werk en die versoeking.
3. Die mens se werk in die sondeval.
4. Genade: die wedergeboorte deur die werk van die Heilige Gees.

1. Die werk van God in die skepping van die mens.

Toe Adam geskape is het hy alles in sy vermoë gehad wat hy nodig gehad het om God te verheerlik.

Hy het geen gebrek gehad nie: geen liggaamlike gebrek nie en ook geen geestelike gebrek nie.
Hy was regdenkend en het voldoen aan die doel waarvoor hy geskape was, naamlik om God te verheerlik en die aarde te bewerk en te bewaak.
Die mens was ook bo alles verhewe. Hebreërs 2:8 is 'n aanhaling uit Psalm 8. Daar staan die volgende van ons geskrywe:

Alle dinge het U onder sy voete gestel. Want in die onderwerping van alle dinge aan hom het Hy niks uitgesonder wat nie aan hom onderworpe is nie.

Die gedeelte openbaar dat daar geen ander skepsel in die hele skepping is wat so verhewe geskape is soos ons nie.

Daarom was daar geen rede waarom die slang Adam en Eva kon verlei nie - soveel te meer omdat hy onder hulle gestel was.
Daar was nie eers gelykheid tussen hulle, sodat hy met hulle sou kon redeneer oor reg en verkeerd nie.

Die hoogtepunt van God se skeppingswerk was toe Hy die mens gemaak het.

Die Here het die mens gemaak met die grootste skoonheid, want hy is die beelddraer van God.
As die Here die mens boos of gebrekkig geskape het, dan beteken dit dat die Here se beeld ook kwaad bevat en iewers gebroke is.
Ons weet dat God volmaak is. Hy het nie die boosheid geskape soos wat Hy die res van die skepping geskape het nie.

Die Here verklaar die skepping ook so:

Alles het die Here gemaak vir sy doel... (Spreuke 16:4).

Die paradysmense het heiligheid en geluksaligheid gehad t.o.v. hulle liggaam en hulle siel.
Hulle het soveel wysheid gehad dat die Here die hele aarde aan hulle toevertrou het.
Met sy verstandelike vermoëns kon hy beslis oor reg en verkeerd.
Verder het die mens geregtigheid gehad.

Adam en Eva het dus heeltemal genoeg verstand gehad om sake te kon beredeneer.

Die mens se saak is soveel sterker as ons daarby in berekening bring dat hy volkome in onskuld was.

Daar was geen sonde of invloede wat hom vooraf al beïnvloed het nie.

Tel dit alles bymekaar:

Die eerste twee mense het die krag en die lus, die wil en volmaaktheid gehad om God te kan dien soos wat dit behoort.
Uit al hierdie dinge is dit baie duidelik dat God ons goed geskape het: baie goed en sonder enige gebrek.

Uit al die dinge wat die Bybel oor die doel van ons skepping openbaar, is dit duidelik:

Die hoogste doel van die mens is om God te verheerlik.
Ons moes met God gemeenskap hê soos wat die engele in die hemel dit doen.Ons lees in Psalm 148:2 en Jesaja 6:3 dat hulle die Here dag en nag verheerlik.
Die hoogste doel van die mens is nie om die aarde te bewerk nie, want as die Here wou, kon Hy die diere ook gebruik het om dit te doen.

Die doel van ons skepping het ook nie met die sondeval tot niet gegaan nie. Dit is nog steeds dieselfde - dit is nou net baie swaarder om dit te doen, omdat die Satan ons teëwerk om dit te doen.

2. Die duiwel se werk en die versoeking.

Die duiwel is ons grootste vyand. Hy is ook openlik God se vyand.

Hy is magteloos teen God, maar hy gee nie bes en gedra hom nie.
Toe hy by Adam en Eva aangekom het, was die opstand in die hemel, waar die Satan en sy volgelinge hulle teen God verset het, al iets van die verlede.
Die Here Jesus Christus openbaar dat die Satan 'n mensemoordenaar is. Vir ons saligheid is dit belangrik dat ons dit moet onthou. Die Here Jesus het ons eenkeer verwyt omdat ons nie na Hom wil luister nie, en toe het Hy die volgende gesê:
Julle het die duiwel as Vader, en die begeertes van julle Vader wil julle doen. Hy was 'n mensemoordenaar van die begin af en staan nie in die waarheid nie, omdat daar in hom geen waarheid is nie. Wanneer hy leuentaal praat, praat hy uit sy eie, omdat hy 'n leuenaar is, en die vader daarvan. (Johannes 8:44)

Omdat die Satan nie die mas teen God kon opkom nie, beskadig hy uit wraak alles wat aan God behoort.

Dit is waarom hy met lis gegaan het en die Here vals voorgestel het aan die twee mense in die Paradys.
Hy het genoeg van God se raad geweet om 'n wanvoorstelling by die mens te skep en die mens ook te beweeg om hoogmoedig te raak en oneerlik te word en teen God in opstand te kom.

Dit verklaar waarom die straf van die Here so onverbiddelik oor die duiwel en die wat hom volg, is.

3. Die mens se werk in die sondeval.

Die mens, wat letterlik alles tot sy beskikking het om weerstand te kan bied teen die duiwel, kom toe in verset teen die Here en verkneg hom aan die Satan.

Adam en Eva het bewus en moedswillig oortree.
Hosea 6:7 sê dat ons troueloos opgetree het. Troueloosheid is absoluut onverskoonbaar.

Kom ons stel dit maklik en prakties:

Ons was skandelik ondankbaar teenoor God. Meteens het ons ontevrede geword om die Here te dien soos wat ons was.
Ons het sy verbond verbreek. Ons wou meteens van die doel van ons skepping ontslae wees, en self soos God wees.
Ons het sy gebod verag.
Ons het God werklik gewantrou. Hierdie versoeking is nie deur God bewerk nie, want ons lees in Jakobus 1:3 dat God niemand versoek nie en dat Hy ook nie versoek kan word nie.

Saam met Adam en Eva het alle mense daardie dag in sonde geval, want dit was die ooreenkoms wat God met hulle gehad het.

Van daardie oomblik af het ons die sondes van ons voorouers geërf en ons eie daarby gevoeg.
Dink maar aan Dawid se woorde waar hy sê dat hy in sonde ontvang en on ongeregtigheid gebore is (Psalm 51:7).

Die effek van hierdie gebeurtenis is baie erg, want van daardie oomblik af het ons liggaam en ons siel 'n knak gekry. Inderwaarheid het ons ons eer verloor, want dit is waarom die Here ons wegjaag uit die plek van sy liefde.

4. Genade: die wedergeboorte deur die werk van die Heilige Gees.

In die verlorenheid van die hele sondevalgebeurtenis gaan die Here se genade by die Satan verby.

Vir die duiwel is daar nooit verlossing moontlik nie. Die duiwel en sy makkers kan nooit weer as God se engele in die hemel kom nie.
Maar vir die mens het God genade: Hy troos die mens.

Jesus Christus sal gebore word. Die Seun uit die vrou se saad.
Hierdie Seun gaan die Satan nie net oorwin nie - dit is 'n straf wat te lig is vir die Satan:

Hy gaan die slang se kop vermorsel.
Die duiwel moet totaal vernietig word.

So bewerk Jesus die pad terug hemel toe vir elke mens wat in Hom glo. Dit is waar bekering ter sprake kom. Hoe ken ek Jesus Christus as Verlosser en hoe luister ek na God die Heilige Gees?

Deur Jesus aanbiddend te gehoorsaam.
Deur te weet wat Hy vra, en dit dan on my lewe nougeset te gaan doen.
Ons gedagtes en ons besluite moet so wees dat die duiwel geen plek daarin het nie. Ons optrede moet so afgerond wees dat dit vry is van sonde en van die invloed van die Satan.

Die Heilige Gees beweeg ons om Jesus Christus as ons Verlosser te ken.

Daarom roep die Here Jesus ons almal vanaand en tydens elke erediens saam rondom sy Woord.
Daar verseker Hy ons dat Hy ons volkome verlos uit hierdie toestand van dood en chaos waarin ons onsself laat beland het.

Adam moes dit ook gedoen het, maar hy het hom oopgestel vir vreemde oortuigings.

Dit moet ons laat besef dat daar net sekere dinge is waarvan 'n mens nie oortuig mag word nie.
Dit is al die dinge wat God se eer raak. Maar die troos is dat ons in al hierdie dinge die leiding het van die Heilige Gees.
Die troos is dat, waar ons foute maak en sonde doen, die Here ons dit heeltemal vergewe wanneer ons berou het daaroor.

Dit is waaroor die Woordverkondiging en die Evangelie van verlossing in ons Here Jesus Christus gaan. Dit is 'n geleentheid wat ons het om met ware berou na die Here toe te kom, en te hoor dat Hy van sy kant af nie die liefdesband met ons deursny nie.

Kyk, dit het ek uitgevind: dat God die mens reg gemaak het, maar hulle het baie slim planne gesoek. (Prediker 7:29)

Toe was die moeilikheid vir ons in blom, maar Jesus kom ons tot hulp. Hy verlos ons in sy bloed en beloof aan ons 'n heerlike toekoms in sy koninkryk.
Amen.

Slotgebed.

Leer ons U regte weë, Here. Wys ons die regte pad. Bekeer ons hart, sodat ons met blydskap die pad van saligheid mag bewandel. Lei ons gedagtes op hulle swerftogte. Weer die kwaad daaruit. Laat ons altyd ons heil van U alleen verwag.
Om Christus ontwil.
Amen.

Slotpsalm 25:6.

Die genade van die Here Jesus Christus en die liefde van God en die gemeenskap van die Heilige Gees bly by u almal.
Amen.

Dr. M.J. du Plessis
Gereformeerde Kerk Bellville
Datum: 27 Julie 2003.